एआइइउडिएफ राजखान्थि दोलोनि गाहाय बदारुद्दीन आजमलआ खौरांगिरिफोरखौ हुमखि होदों
गुवाहाटी/हाटसिंगिमारि 27: ऑल इंन्डीया इउनायटेड डेमक्रोटिक प्रन्ट राजखान्थि दोलोनि गाहाय मौलाना बाद्रुद्दीन आजमल बिथांआ मानकाछार जिल्लायाव जानाय टेलिभसन चेनेलनि प्रेस कन्पारेन्सआव खौरांगिरिफोरनि माइकखौ सेख’नानै मुगैथाव बाथ्राजों रायनायजों लोगोसे धमकि होदों।
भिडिअ’नि गेजेरजों नुनो मोन्नाय जायोदि, आजमल आरो AIUDF नि दोलोआ दासान्दि आसामनि थाखा जेबो खामानि मावनो सानाखै नाथाय गोदान दिल्लीआव जानो गोनां ‘महा घातबन्धन’नि थाखाय साखाफारा जागासिनो दं।
“गोदान दिल्लीआव ‘महा बन्धन’जों लाजानाय आदब खायदाजोंनो जों राजखाथिआरि बिथिंआव थाबायलांगोन” होन्ना आजमल बिथांआ खौरांगिरिनि सिगांआव बुङो।
मोगा मोगिआव जेब्ला आजमल बिथांखौ ‘महा बन्धन’नि जथुमायाव सोरजों थागोन? बिजेपि दोलोजों थागोन ना? कंग्रेस दोलोजों थागोन होन्ना सासे टेलिभिसन खौरांगिरिआ सोंथि सोंनायाव आजमल बिथांनि रागाया थिखिनिआव दावखोयो आरो खौरांगिरिखौ बुङोदि, “बेनि थाखाय बेसेबां कौटी रां होगोन? नों बेखौ रिकर्ड खालामगासिनो दंना...? सैमानि फिसा..। सासे खौरांगिरिआ बेबादि खालामनो हाया...। खौरां बिजोंखौ नों मान होआखै। गुबुन खौरांगिरिफोरा नोंबादि नङा..। बे सासे खौरांगिरिआ जोंखौ नोजोर होगासिनो दं...। हात..। सैमानि फिसा...। सैमा..। दानो खर’ बुखावगोन.. आंजों हाजार हाजार मानसिफोर दं” होन्ना खौरांगिरिखौ हुमखि होयो।
मखनो गोनांदि, AIUDF नि गाहाय बाद्रुद्दीन आजमल बिथांआ प्रेस खन्पारेन्सनिफ्राय सिखारनानै खौरांगिरिनि माइकखौ सेखयो आरो दानो माइकजों खर’बुखावगोन आरो जिउ फोजोबगोन होन्ना बुंबावो।
बिथांआ खौरांगिरिखौ बुंबावोदि, “नोंनि नोम्पाया बिजेपि नंआब्ला कंग्रेसजों फान्जाबाय जानांगौ, नाथाय आनि AIUDF दोलोआ नङा”। बेआव गोबां मानसिफोर दं, नाथाय बिथांमोनहा बेफोरबादि सोंथि सोङाखै होन्ना बिथांआ बुंबावो।
फारसेथिं सुबुं माहारिनि 4थि खाम्पा एबा मेडियानि आयेन सिफायनायनि थाखाय बिथांनि बेरेखायै इलेकट्रनिक मेडिया फराम आफादनि सोद्रोमाफोरा खुगायाव गोसोम सि खानानै सिरियै गुवाहाटी नोगोरमानि गनेसगुरि आरो आसामनि गोबां गुबुन गुबुन जायगाफोराव AIUDF राजखान्थि दोलोनि गाहाय बादारुद्दिन आजमलनि बेरेखायै धर्ना होदों आरो थैबैनो 24 घन्टानि गेजेराव निमाहा बिनो खावलायदों।
मखनो गोनांदि, थारै बिथांनि आखुथायआ बेफोरबादि जानो नाङामोन, सासे दैदेनगिरिनि आखुथाया बेफोरबादि जायोब्ला आसाम हादोरसानि थासारिआ इउनाव माबादि जाहैगोन बेफोरनि सायाव साननांगौब्ला गोमोथाव। मानोना बिथांआ थांनाय 2014 माइथायाव खुंफुजानाय लख साभानि बिसायखथिआव आसामनि King Maker जानानै गिबि मंत्रीनि मासिआव जिरायगोन होन्ना बिथांआ बुंदोंमोन।
बेफोरखौ नोजोर होनानै डिजिटेल खौरांगिरिफोरजों लोगोसे दुलाराय आसाम फरायसा आफादआ दुखुमोन्नाय फोरमायदों। मानोना बिथांमोनहा सानदोंदि इउनाव बेफोरबादि मानसिआ आसामनि गिबि मंत्रीनि मासिआव गमामायैनो जिरायमारोब्ला आसामनि थासारिआ माबादि जागोन, जाय बिथांआ मेडियानि गोनांथिखौ बुजिनो रोङा, बे बिथांआ आसाम हादोरसाखौ दैदेनोब्ला।
