गुवाहाटी,सेप्तेम्बर 30: आसाम हादोरसानि खुंथायाव थानाय बिजेपि सरकारनि लोगो एजिपिनि राजखान्थि हान्जानि दोलोआ हादोरनि नोगोरारि बिल 2016 खौ बेरेखा खालामबोगासिनो दं। सुक्रबाराव बिथांआ खौरांगिरिफोरनि सिगांआव बुंदोंमोनदि, जुदि मिरु सरकारा नोगोरारि बिल 2016 खौ आसाम हादोरसायाव सोदांगोन अब्ला हादोरसानि खुंथायाव थानाय लोगो जानायनि बोन्दोंखौ बसगोन।
बेबादिनो हादोरनि नोगोरारि बिल 2016 नि बेरेखा खालामनायखौ गोख्रों खालामनो थाखाय बिथांजों लोगोसे एजिपि दोलोनि हान्जाया सनिबाराव बिहार हादोरसानि खुंथायाव थानाय JD(U) राजखान्थि हान्जा आरो गिबि मनट्री नितिस कुमार बिथांनि हेफाजाब बिहैयो जाहाथे पारलियामेन्टआव हेफाजाब होयो।
बे दोलोखौ दैदेनदोंमोन एजिपि राजखान्थि हान्जानि आफादगिरि आरो हादोरसानि आबाद जौगाखां बिफान्नि मनट्री अटुल बरा बिथांआ लोगोसे बारग आसामनि गिबि मनट्री प्रपुल्ल कुमार महन्ट बिथांआबो लोगोआव थांफायो आरो बिहार हादोरसानि पान्टायाव थानाय गिबि मनट्रीनि मावख’आव लोगो हमहैयो।
एजिपि हान्जानि दोलो गिबि मनट्रीनो गोसोखां बिलाइ गथायनानै पारलियामेन्टनि सिंआव आरो बाहेरायावबो हेफाजाब होनानै नोगोरारि बिल 2016 खौ बेरेखा खालामनो खावलायो।
मख’नो गोनांदि, नोगोरारि बिल 2016 नि गेजेरजों गुबुन हादोरफोरनिफ्राय फैनानै आसामाव जायगा लाफैनाय हिन्द, क्रिस्टान, जैन, बुद्दिस हारिनि सुबुंफोरनो भारत सरकारआ थामोन्था होनो नागिरगासिनो दं जायनि जाहोनाव आसाम हादोरसानि सुबुंफोरनि थाखाय धर्ना होनायनि मोनसे फुंखा जानानै दं।