क’कराझार,फेब्रुवारि 25: हादरनाङैनो प्रधान मंत्री किसान सम्मान योजना (PM-Kissan) खौ फोसावनाय लोगो लोगोनो आसाम हादोरसानि गुबुन गुबुन जायगाफोरावबो खेबसेयैनो फोसावनानै होयो।
बीटीसी खुंथायनि आबाद बिफानजों लोगोसे जिल्ला खुंथाया रबिबारखालि क’कराझारनि बेसिक ट्रेनिं मिरु आव हाबाफारि लानानै क’कराझार जिल्लायावबो प्रधान मंत्री किसान सम्मान योजनाखौ फोसावनानो होयो।
बेखेवनाय हाबाफारिआव हादोरसा समाज जौगाखां बिफान्नि मंत्री प्रमिला रानि ब्रम्ह आरो बीटीसी खुंथायनि EM दनेस्वर गयारि बिथांमोनहा गाहाय आलासि महरै नुजाथिनानै हाबाफारिखौ बेखेवनानै होयो।
मंत्री प्रमिला रानि ब्रम्ह बिथांआ प्रधान मंत्री किसान सम्मान योजना स्किमखौ फारसेनिफ्राय फोरमायनानै होयो आरो बिथांआ बुङोदि, बे स्किमनि गेजेरजों फिसा फिसा आबादारिफोरनि नखरनो 6,000 रांनि अनसुंथाय होगोन जाय बिथांमोनहा जयै एबा हारसिङै 2 हेक्टनि बारा आबाद मावग्रा हा दं। बे स्किमनि खाबुखौ मिरु सरकारा थोंजोङै 100 जौखोन्दोखो हरजोबगोन। बे रांखौ खेबसे इन्सटलमेन्ट आव गासै 2000 रां हरनानै गासै खेबथाम इन्सटलमेन्ट आव फोजोबगोन जाय रांआ खाबु मोनग्रिरिफोरनि बेंक एकाइनाव थोंजोंयै सोनानै हरगोन होन्ना ब्रम्ह बिथांआ दाजाबदेरो।
हादोरनि रांखान्थियारि बिथिंखौ जौगाखांनाय लाबोनो थाखाय रानि बिथांआ आबादारिफोरखौ माल्टिपल ख्रपिं एबा मोनसे समावनो, मोनसे हायावनो, मोन्नै, मोनथान आबाद मावनानै दिहुन्थायखौ बांहोनायाव गोसो होनो खावलायो।
बीटीसी खुंथायनि EM दनेस्वर बसुमथारि बिथांआ PM-Kissan योजनाखौ बेखेवनानै बीटीसी ओनसोलखौ आबाद बिथिंआव जौगाखांनाय लाबोनो थाखाय हानायमानि आबादारिफोरनिफ्राय हेफाजाब खावलायो। हादोरनि आबादारि बिथिंखौ जौगाखांनाय लाबोनो थाखाय बीटीसी खुंथायनिफ्राय नांगौबादि हेफाजाब होगोन होन्नानै रानि बिथांआ आबादारिफोरखौ खोथा होयो।
प्रधान मंत्री किसान सम्मान निधी योजनानि गेजेरजों क’कराझार जिल्लानि गासै सा 80,000 आबादारिफोरनि गेजेराव गासै 30,000 आबादारिफोरा गिबि खेबनि खाबुखौ मोनगोन। हादोरनि गाहाय मंत्री नारेन्ड्र मोडी बिथांआबो 53थि “मन कि बात” नि गेजेरजों थोंजोङै रेडिअ’नि गेजेरजों सावरायहरदोंमोन।
क’कराझार जिल्ला लोगो खमिसनार प्रपुल्ल चन्ड्र बर्मन, बीटीसी जयेन सेक्रेटारि माजेन्ड्र बसुमथारि, बीटीसी आबादा बिफान्नि डायरेक्टर एम सर्गीयारि बिथांमोनहाबो बाहागो लादांमोन।
लक्किमपुर: आबाद बिथिंआव जांख्रिखांनाय लाबोनो थाखाय हादोरनि गुबुन गुबुन जायगाफोराव फोसावनायजों लोगोसे लक्किमपुर जिल्लायावबो रबिबारखालि प्रधान मंत्री किसान सम्मान योजना स्किमखौ फोसावनानै होयो।
बेबादिनो गौरिसागड़ आरो मरिगांव जिल्लाफोरावबो फोसावानानै होदों होन्ना खौरां मोनबावनाय जायो।