क’कराझाराव जिनाहारि आरो बोथारनाय जादोंब्लाबो मेलाया सोलिगासिनो दं

टंला,अक्टबर 29: सुक्रबारनि मोनायाव क’कराझार पुलिस थानानि बेन्दोंआव थानाय घग्रापारानि 17 बोसोर बैसोनि सासे हिन्जावसाखौ गेन्द्राबिलाव सोलिपुबाय थानाय माइनाव फुजानि मेलानिफ्राय एबा क’कराझार टाउननिफ्राय 5 कि.मि. गोजानाव सोरबा सिनायनो मोनै सुबुंआ लांखारनानै जिनाहारि खालामना बुथारदोंमोन। हिन्जावसानि गोथै देहाखौ सनिबारनि बेलासिआव दुब्लिबारिआव आयथिंआव खाख्रबनाय आरो अरजों सावनायनि फोरमान मोन्नाय जादोंब्लाबो क’कराझार जिल्लानि मेलाया सोलिफुगासिनो दं।

मख’नो गोनांदि, क’कराझार जिल्लानि सिङाव थानाय गोबां जायगाफोराव मेलाफोरा सोलिगासिनो दं जेरै- गेन्द्राबिल, बासबारि, चरायकला, स्यामगामि, सातबिन्दो, कांक्रायबादा, कारिगांव, सिमबोरगांव, आलांगि, आतियाबारि, बालांगा, आरो बनरगांव, फारसेथिं खेला गेलेनाय आरो जौ फान्नायफोरा बैफोर मेलाफोराव बांद्राय होन्नानै मिथिनो मोन्नाय जादों।

गासै मोन 14 सो सुबुं आफादफोरा मेलानि समाव जौ फान्नाय आरो जुवा गेलेनायफोरखौ बन्द’ खालामनो थाखाय मोनफ्रोमबो फुजानि खमिटीफोरखौ बिथोन होदोंमोन। बेजों लोगोसे बेफोर आफादफोरा जिल्लानि डिपुटी कमिसनार बिथांनोबो Memorandum जमा होदोंमोन जाहाथे फुजा-मेलायाव जौ-जुवा आरो गुबुन गेलेनायफोरखौ बन्द’ खालामो। नाथाय जिल्ला खुंथाया मोन 14 आफादनि गसर दैखांनायखौ नोजोर होआखैमोन जायनि जाहोनाव फुजा-मेलाफोरा हिन्जावफोरनि थाखाय रैखाथि गैया जानानै फैदों।

फारसेथिं बारग राज्य’ सबानि MP उरखाव गोरा ब्रम्ह बिथांआ गेन्द्राबिलाव 17 बोसोर बैसोनि हिन्जावसाखौ जिनाहारि खालामना बुथारनाय जाथायखौ गोख्रों रावजों सोंखारियो आरो बिथांआ बुङोदि, जायखिजाया मेलायावनो जिल्ला खुंथाया आयजोफोरखौ रैखाथि होनांगौ, मोनफ्रोमबो मेलायावनो पुलिसनि सोद्रोमाफोरखौ दैथाय हरनांगौ, फुजा खुंगिरि एबा खमिटिफोरा मेलानि साखाथि-फाखाथि भलनटियारफोरखौ थिसननांगौ आरो जिल्ला खुंथाया मोनानि 8 MP निफ्राय मेलाखौ बन्द’ कालामना होनांगौ होन्ना बिथांआ बुंबावो।

फारसेथिं बिटिची नात यगि सनमिलनि आफादआ जाथायखौ गोख्रों रावजों सोंखारिनायजों लोगोसे जाथायजों लोब्बा थानाय दायनिगिरिखौ 48 घन्टानि गेजेरावनो खानांगौ होन्ना जिल्ला खुंथायखौ हुमखि होयो।