क’कराझाराव बर’ फरायसा आफादआ मुंख्लं मनेस्वर बसुमथारिखौ गोसोखांनानै ममबाथि सावदों
क’कराझार,फेब्रुवारि 16: सुक्रबारनि मोनाब्लिआव क’कराझार जिल्ला दुलाराय बर’ फरायसा आफादआ उदखारिफोरनि हेंथा खालामनानै आखायाव ममबाथि सावनानै क’कराझार टाउनाव हान्जा सुरनानै गोख्रोङै धर्ना होदों। बिथांमोनहा जम्मु आरो काश्मीरनि पुलवामा जिल्लायाव थांनाय 14 फेब्रुवारि 2019 आव उदखारिफोरनि गाग्लोबनाय आरो सा 44 भारतीय’ सीआरपीएफ रौनिया हान्जानि जिउ खहा जालांनायखौ दुखुमोन्नाय फोरमायो।
खौरां मोन्नाय बादिब्ला बिथांमोनहा आखायाव ममबाथि सावनानै क’कराझार टाउननि बड’फा चिलड्रेन पार्कनिफ्राय जागायनानै जोहोलाव दैमालु रोड दानानै प्रागती भबनसिम हान्जा सुरदों। हान्जा सुरनायजों लोगोसे बिथांमोनहा उदखारि हान्जानि बेरेखायै गोख्रोङै स्लगानबो होदों होन्ना मिथिमो मोनबावनाय जायो।
मखनो गोनांदि, उदखारिफोरनि गाग्लोबनाय आरो हरखाब सा 44 सीआरपीएफ रैनिया हान्जानि गेजेराव आसाम हादोरसानि बीटीसी खुंथायनि सिङाव थानाय बाक्सा जिल्ला कालबारि गामिनि मनेस्वर बसुमथारि बिथांआबो सासे।
उदखारिफोरनि हेंथायै धर्ना होगिरि बिथांमोनहा हादोरनि थाखाय गावनि आगोमा जिउखौ बावलांनाय बसुमथारि आरो सा 44 सोद्रोमाफोरनि जिउमानि थाखाय इसोरनि खाथिआव से मिनिट सिरियै आरज गाबो होन्ना मिथिनो मोन्नाय जायो।
हान्जा सुरनाय हाबाफारिआव बार्ग राज्य’ सभानि एमपी उरखाव गोरा ब्रम्ह बिथांआ खौरांगिरिफोरनि सिगांआव बुङोदि, जाय गोहोआ हादोरनि बेरेखा आरो भारतनि बेरेखा बिथांनि हेंथायै जों बर’फोरा खौसेथि दं, हादोरनि थाखाय मुंख्लं जालांनाय बिर जोहोलाव आरो बाक्सा जिल्लानि मनेस्वर बसुमथारि बिथांनि नखरजों लोगोसे जों दुखु फोरमायो, जाय बिथांआ बर’ माहारिनि सासे जोहोलावमोन।
बर’ फरायसा आफादआ गोबाव समनिफ्रायनो उदखारिफोरनि हेंथायै राव होबोगासिनो दं, बर’ फोरा कार्गिल दावहायावबो हेफाजाब होनानै आलादा राज्यो बड’लेन्डनि सोमावसारनायखौ दोनथ’दोंमोन आरो दिनैबो जों बर’फोरा खौसेथि गसङो, जाय गोहोआ हादोरनि बेरेखा होन्नानै बिथांआ बुंबावोदि, “बर’फोरा हरखाब नांगौ समाव खौसेथि गसंगोन”। फारसेथिं अल बड’लेन्ड माइनरिथि स्तुदेन्ट इउनियन (ABMSU) आबो डिपुटी खमिसनारनि मावखनि साखाथिआव थानाय चिल्ड्रेन पार्क आव आखायाव ममबाथि सावनानै मुंख्लंफोरनि जिउमाखौ गोसोखाङो आरो दुखु फोरमायो।
