क’कराझार सीआइटीखौ गोजौ मोनसे थाखोआव थिसनबाय
क’कराझार,डिसेम्बर 22: बड’लैन्ड हालामनि क’कराझार जिल्लानि सिङाव थानाय सेन्ट्रल इन्सटीटीव अव टेक्नॉलजी एबा सीआइटीखौ मुलुग सोलोंसालि एबा Deemed University नि फारिलायाव लांबाय जाय मावथांखिआ 2003 माइथायाव जानाय बीटीसी एकर्डनि सोलोंसालिखौ फोजौखांनायनि मोनसे मावफारियामोन आरो बेखौ थाबैनो मोखथांआव महर होगोन होन्ना मिथिनो मोन्नाय जायो।
मखनो गोनांदि, बे मावफारियाखौ जेब्ला 2016 माइथायाव भारतनि गाहाय मनट्री नारेन्ड्र मोडी बिथांआ क’कराझाराव फैदोंमोन अब्ला बिथांआ क’कराझार CIT खौ मुलुगनां सोलोंसालिनि (Deemed University) फारिलाइआव थिसनगोन होन्ना खोथा होलांदोंमोन बेबादियैनो थांनाय 13 डिसेम्बर 2018 आव भारत सरकारनि Ministry of Human Resource Development बिफाना नटिस होनानै फोसावनानै होदोंमोन।
बीटीसी खुंथायनि डिपुटी गाहाय खाम्पा बरगयारि बिथांआ खौरांगिरिफोरनि सिगांआव बुंदोंदि, सान्नै सिगां बिथांआ मिरु सरकारनि नखर मनट्री आरो MHRD बिफान्नि माखासे नेहाथारिफोरजों गोदान दिल्लीआव सावरायमेल लादोंमोन आरो बे मेलावनो सेन्ट्रल इन्सटीटीव अव टेक्नॉलजी(CIT) खौ गनायथि जानाय मुलुगनां सोलोंसालिनि फारिलाइआव थाबैनो दोनगोन होन्ना खोथा होदों।
2003 माइथायनि बीटीसी एकर्डआव थानाय दफाफोरखौ सोदांनाय हाबाफिरि बादियै भारत सरकारा जोंनि दाबिफोरखौ मोनसेनि उनाव मोनसे सुफुंलांगासिनो”होन्ना बरगयारि बिथांआ बुङो आरो बिथांआ दाजाबदेरोदि, बे हाबाफारिआ जोंनि मोनसे गेदेत जाफुंसारनाय जाय हाबाफारिनि गेजेरजों क’कराझार सीआइटीखौ जौगानायाव मदत होगोन आरो फरायसाफोरा खाबु मोनगोन।
राज्य’ सभानि MP बिस्वजित दैमारि बिथांआ बुंबावोदि, CIT खौ फोजौखांनाय खामानिआ बीटीसी एकर्डनि मोनसे बाहागो” बीटीसी एकर्डखौ सोदांनायनि थाखाय आरो दाबिखौ सुफुंनायनि थाखाय बिथांआ हादोरनि गाहाय मनट्री नारेन्ड्र मोडी बिथांखौ साबायखर जासियो।
बड’लैन्ड जनजाति सुराक्सा मन्चानि गाहाय आफादगिरि जनकलाल बसुमथारि बिथांआबो मावनो लानाय हाबाफारिखौ बरायो आरो बिथांआ बुङोदि, हादोरसा सरकार आरो मिरु सरकार मोन्नैबो संबिजिरनि 6थि दफानि आयेन बादियै दाफुंजानाय बीटीसी आव थानाय ट्रायबेल सुबुंफोरनि गोनांथिखौ सुफुंना होनांगौ। बिथांआ गावनि बिबुंथिआव दाजाबदेरोदि, ट्रायबेल सुबुंफोरनि राजखान्थि मोन्थाय, हानि मोन्थाय, साक्रि, सोलोंथाय आरो गुबुन गुबुन बिथिंफोरनि थिखानाय मासिखौ संबिजिरनि आयेन बादियै रैखाथि होनांगौ।
