हामरेन,नवेम्बर 26: आसाम हादोरसानि बेंखनाव थानाय कार्बि आंलं आरो दिमा हासाव जिल्लाफोरनि बर’ सुबुंफोरनो मिरु सरकारनि मावथांखि बादियै सेडियुल ट्रायब (हाजो) बिमुंनि गनायथि होनो नागिरनायखौ बेरेखा खालामनानै कार्बि फरायसा आफादजों लोगोसे मोन 16 गुबुन गुबुन आफादफोरा दिनै (26 नवेम्बर) कार्बि आंलं आरो दिमा हासाव मोन्नै जिल्लाफोराव 12 घन्टा बन्द’ फोसावदों।
खौरां मोन्नाय बादिब्ला बिथांआ मोनहा मिरु सरकार, आसाम सरकार आरो कार्बि आंलं औटनमाच काउनचिल (KAAC) खुंथायनि बेरेखायै गावसोरनि दाबिखौ सुफुंनांगौ होन्नानै मोन्नै जिल्लाफोराव थानाय बर’ कछारिफोरनो ST (H) बिमुंनि गनायथि होनो नागिरनाया आयेन बेरेखा होन्ना बुंदों।
हाजो ओनसोलाव थानाय बर’फोरा रांखान्थियारि, समाज आरो सोलोंथाय बिथिंफोराव गुबुन रोखोमनि आरो गुबुन हारिफोरनिफ्राय गोग्लैसोनानै थासिन्नाय। ब्रितिसफोरा बे बाथ्राखौ गनायनानै लादोंमोन जायनि थाखाय बिथांमोनखौ गुबुन ओनसोलाव थानाय बर’फोरनिफ्राय आलादा खालामनाय जादोंमोन। बेनि थाखायनो Article 330 (1) (b) आरो (c) खौ होनानै औटनमास जिल्लाफोराव थानाय बर’फोरनो एसेमब्लि आरो पारलियामेन्टारि एसेमब्लिफोराव रिजार्वेसननि मासिखौ दोन्नाय जादोंमोन। बैफोर जाहोन्नि थाखायनो आसाम हादोरसायाव थानाय मोनसे हारिखौ खावनै खालामनानै होदोंमोन” होन्ना बिथांमोनहा बुंदों।
बावैसो सिगां ASDC आ फोरमायनानै होदोंदि, “आसाम हादोरसायाव संबिजिरनि 1950 माइथायनि Part-II नि अर्दार एबा बिथोन बादियै ST नि फारिलाइखौ खावनै खालामनानै होनाय जादों, जेराव मोन 15 हारिफोरजों लोगोसे कुकि हारिनि मोन 37 हारिसाफोराबो हाबफानानै दं, नाथाय बर’ कछारिफोरा बे फारिलाइआव गोया। मानोना बर’फोरा मिथिगौदि बिथांमोनहा हाजो ओनसोलनि थागिरि नंआ बेनिखायनो फारिलाइआव गोया। 1950 माइथायाव माखासे थादोंमोनब्लाबो 1960 माइथायनिफ्राय हायेनाव खारख्लाय लांदों” होन्ना बिथांमोनहा बुंबावो।
बिजेपि दैदेन्नाय सरकारा राजखान्थिआरि सार्थआव बर’फोरनो सेडियुल ट्रायब (ST) बिमुंखौ होनो नाजागासिनो दं, बे मावफारिया लानाया गोग्लैसोनानै थाखाय हारिफोर जेरै-कार्ब, दिमासा, गार’, हमार, कुकि, कासि, जयनतिया, मान आरो नागाफोरखौ नाख्रेबनो नाजानाय।
"बर’फोरनो ST बिमुं होनाया संबिजिरनि Article 330 (1) (b) आरो (c) फोरखौ सिफायनाय जागोन। गोजौ थाखोनि बर’फोरनो ST बिमुं होनाया जोबोर गाज्रि अबस्तायाव गोग्लैसोनानै थानाय हारिफोरखौ गाज्रिनिफ्राय गाज्रिसिनाव लांगोन आरो Advance एबा गोजौ थाखोनि बर’फोरजों सरकारि साख्रिनि थाखाय जुजिनांगोन होन्नानै" बिथांमोनहा बुंबावो।