गुवाहाटी: केरेलायाव खोला-सोनाबनि बारजों फैनाय बांद्राय अखाया गोमोथावै दैनि बाना सोमजिहोनानै ओनसोलनि जिउजों लोगोसे गोबां धोन-सम्पथि खहा कालामगासिनो दं। केरेला हादोरसायाव गुबुन गुबुन हादोरसाफोरनि साबसिन जिउ नागिरनानै खामानि मावनो थाहैनाय सुबुंफोरखौ रैखाथि होनो थाखाय स्पेसियेल मावथांखि लादों। गासै आसामनिफ्राय आलासि खामानि मावनो थाहैनाय सुबुंफोरा सा 60,000 दं होन्ना खौरां मोन्नाय जायो।
गोमोथावदि, आसाम सरकारा आयेन बादियै दासिमबो गुबुन हादोरसायाव खामिनि मावनो थाहैनाय सुबुंफोरनि फारसे जेबो दाटा गैया आरो मिथिया। आसाम हादोरसाया इसोरनि सोरजिनाव बांसिन बोलोनि खामानि मावनो हानाय हादोरसाफोरनि गेजेराव सोनाब बेंगलनि उनाव नैथि फारिआव दं। बैफोर खामानि मावनो थाहैनाय सुबुंफोरा बांसिनै हान्थामेलानि बिथिंआव खामानि मावगासिनो दं होन्ना खौरां मोनो।
केरेला सरकार Labour Commission नि आलेजेन्डार बिथांआ सेंन्टिनेलनि खौरांगिरिनि सिगांआव मिथिहोयोदि, हादोरसायाव गासै 3 लाख खामानि मावनो थाहैनायफोरा मुं थिसनजानाय, जायखौ आलासि महरै हादोरसायाव खामानि मावनो दोन्नाय जादों, बेनिनो 20% आसामनि जेराव गासै 60,000 सुबुंफोर दं आरो सोनाब बेंगलनि खामानि मावनो थाहैनाय गासै 40% दं होन्ना बिथांआ मिथिहोबावो।
“जों बिथांमोनि थाखाय जाथायजों फुगिनांनाय आलासि नायगिदिंग्रा रैखाथि बादाबो खालामनाय जादों, बेफोर सुबुंआ रैखाथि हान्जानि नम्बर (04712330833 आरो 07012109743) आव हेफाजाबनि थाखाय खौरां लानो हागोन, जाय नम्बरनि गेजेरजों असमिया, बेंगलि, उड़िया आरो हिन्दी रावजों रायज्लायहरनो हागोन। रेल आरो गुबुन गुबुन हान्थामेलाफोरा जागायफिनब्लानो बिथांमोनखौ नांगौबादि गाव गावनि हादोरसायाव दैथाय हरनाय जागोन” होन्ना बिथांआ बुंबावो।
आसाम सरकारा बेफोर जेंनाफोरनि फारसे माबाफोर खौरां लादों नामा होन्ना जेब्ला खौरांगिरिआ सोङो, अब्ला आलेजेन्डार बिथांआ बुङोदि, उड़िसा सरकारनि अनगायै दासिम गुबुन हादोरसाफोरा खामानि मावनो थाफैनायफोरनि फारसे जेबो खौरा लायाखै।
खाफाल गोनांदि, दासिम रावबो खामानि मावनो थाफैनाय आलासि बिथांमोनि जिउ गोमानायनि खौरां मोन्नाय जायाखै, Labour Commissioner आ बुङो।
लेबर आरो स्किल मनट्री टि.पि रामाक्रिस्नन बिथांआ बुङोदि, हादोरसाया आलासि बिथांमोनखौ जिउ रैखाथि होनो थाखाय गोख्रों मावथांखि लादों।
मखनो गोनांदि, केरेलायाव दै बानानि जाथायजों गासै सा 300 सुबुंफोरा जिउ गोमानांबाय आरो रोजा रोजा सुबुंफोरा न’ गोयै जानांबाय, हादोरसानि इरनाकुलाम, ट्रिसुर, आरो चेनगान्नुर ओनसोलफोराव दै बानाया गाज्रिसिन महर मोनदों होन्ना खौरां मोनो।