खर’आव जाल गोनां आयजोखौ लोगो नांनानै जिनाहारि खालामदों

नगांव,मार्च 5: आसाम हादोरसानि नगांव जिल्लानि सिहाव थानाय काचुवा गामिआव साबासो दुथांनि हान्जाया लोगो नांनानै खर’ आव जाल गोनां आयजोखौ जिनाहारि खालामनाय जाथाया ओनसोलाव सोमोनांहोदों। जाथायखौ पुलिस केसनि रेजिस्तार आव थिसन्नाय जायो, सोंनाय फिन्नायआ सोलिगासिनो दं।

खौरां मोन्नाय बादिब्ला जाथाया थांनाय रबिबारनि मोनायाव जानानै थाङो। जेब्ला जाथायजों फुगिनांनाय आयजोआ सानसेनि उनाव न’आव थांनानै न’नि सोद्रोमाफोरनो खुगाजों फोरमायनानै होयो अब्ला न’खरनि सोद्रोमाफोरा जाथायखौ मिथिनानै खाथिनि पुलिस थानायाव जाथायनि सोमोन्दै पुलिसनो गिबि खौरां (FIR) होयो।

नखरनिफ्राय खोरांगिरिफोरनो फोरमायनानै होनाय बादिब्ला जाथायजों फुगिनांनाय आयजोआ रबिबारनि मोनाब्लिआव साइकेल सालायनानै गिदिंग्लांदोंमोन आरो न’नि सुबुंफोरा मोनाब्लिनि गोबाव सम नेनायनि उनावबो न’सिम सफैफिनाखैमोन। बे जाथायानो न’खरनि थाखाय पुलिसनो खौरां होनांगौनि सांग्रां जानानैगौ थाहोखादोंमोन। गोबां नागिरनो नाजानायनि उनावबो नखरनि सुबुंफोरा रबिबारनि मोनायाव मोन्नो हायाखैमोन।

अखानायै आयजोआ समबारनि फुंआव न’आव फैनानै नखरनि सोद्रोमाफोरनो रबिबारनि मोनायाव सिनायनो मोनै दुथांफोरा लोगो लानानै जिनाहारि खालामनाय जाथायनि सोमोन्दै बुंफोरनानै होयो आरो पुलिसनो खौरां हरनानै केस रेजिस्तार खालामो।

पुलिस बिफानाव मिथिनानै जेब्ला पुलिस बिफान्नि सोद्रोमाफोरा जाथाय थिलिआव थांनानै नायो अब्ला आयजोनि सिङाव गानग्रा सि आरो आसानफोरखौ मोन्नायजों लोगोसे फेग्रा बेसाद whiskey आरो माखासे मैगंफोरबो मोन्नाय जायो आरो आन्जाद नायनो दैथायहरो। जाथाया आयजोनि थाखुलिनिफ्राय 12 कि.मिटार जान्थायाव जादोंमोन होन्नाबो खौरां मोन्नाय जायो।

कचुवा पुलिस थानानि OC सिधेस्वर बर’ बिथांआ सेंन्टिनलनि खोरांआव फोरमायहरोदि, “जों दासिम जाथायजों लोब्बा थानाय दुथांफोरखौ मिथिनो मोन्नाय जायाखै, फारसेथिं जाथायजों फुगिनांनाय आयजोआ फोरमायनाय बादिब्ला सासे मुवा बेसाद फानदिंग्रा (Hawker) आ लोब्बा दं, बेजों लोगोसे गुबुन सा 6 सुबुंफोराबो लोब्बा दं”।

OC सिधेस्वर बर’ बिथांआ फोरमायहरबावोदि, जाथायखौ लानानै IPC नि नं 120(b) आरो 376(d) नि आयेन बादियै नं 56/19 आव केस थिसन्नाय जादों। साफ्रोमबो लोब्बा थानाय सुबुंफोरा ओनसोलनिफ्राय खारखोमानानै दं होन्ना बिथांआ फोरमायबावो।