गं 539 बर’ गामिफोरा दासिमबो पन्चायत खुंथायनि सिंआव फैआखै: एबसु
गुवाहाटी,नबेम्बर 9: गोमोथाव आरो दुखुनांथावदि उदांस्रि मोन्नाया 70 बोसोर जालांदोंब्लाबो हादोरसायाव दासिमबो 50,000 सुबुंफोर थानाय 539 गामिफोरा पन्चायतटी राज खुंथायनि सिङाव फैयाखै। बैफोर सुबुंफोरा आसाम सरकारनि फोसावनायबादियै “हाग्रा ओनसोल”आव थाग्रा।
बेफोर जाथायखौ नोजोर होनानै दुलाराय बर’ फरायसा आफाद, एनडिएफबि(पि) आरो पिपल्स जयेन एक्सन खमिटी पर बर’लैन्ड मभमेन्ट बर’नि आफादफोरा बैफोर गामिफोरखौ पन्चायतटी राज खुंथायनि सिङाव लाबोनो थाखाय हादोरसा सरकारनो 1 सप्ता सम होदों आरो आयेन बादियै पन्चायतनि बिसायखथिखौ खुंफुंनांगौ होन्ना दाबि दैखांदों।
539 गामिफोरनि 50,000 सुबुंफोरा पन्चायती राज खुंथायनि सिङाव जेबो जौगाखां स्किमफोरखौ मोनाखै। बेकायनो बिथांमोनहा देहायारि फाहामथाय खाबु, सोलोंथाय, लोंनाय दै, मोब्लिब गोहो, फोनांजाबनाय लामा आरो बायदि बायदि बिथिंनि खाबु मोन्नांगौनिफ्राय नाथ्रोदनानै दोनजादों, जायनि जाहोनाव बेफोर गामिफोराव थानाय उन्दै गथ’साफोर, आयजो, फरायसा, आबादारि आरो बैसो जानाय सुबुंफोरा जिउ खुंनायाव बायदि बायदि जेंनाफोरजों मोगा मोगि जाबोगासिनो दं।
539 गामिफोरा सनितपुर आरो बिस्वानात जिल्ला, जाय जिल्लाफोरा तेजपुर लख सभा बियाबनि सिङाव गोग्लैयो आरो लेजिसलेटिव एसेमब्लिनि मोनब्रै बियाबफोर फारियै धेकियाजुलि, सुतिया, रांगापारा आरो बिस्वानात। गोमोथावै सनितपुर जिल्लायाव गासै गं 482 गामिफोर दं।
दुलाराय बर’ फरायसा आफादनि आफादगिरि प्रमद बर’ बिथांआ बुङोदि, “539 गामिफोराव थानाय सुबुंफोरा आयेन बेरेखायै गुबुन हादोरनिफ्राय फैनानै थाफैनाय सुबुं नङा, नाथाय नंगुबै भारतनि नोगोरारिसो आरो संबिजिरनि आयेन बादियै पन्चायतनि बिसायखथिआव भट होनो हानायनि मोन्थाय दं, आसाम एसेमब्लि आरो पारलियामेन्टारि बिसायखथिआव होनो हायोब्ला पन्चायतनि बिसायखथिआव मानो होनो हाया, बेयो माबोरै जाथावगौ?”।
बे जेंनाखौ लानानै एबसुनि आफादगिरि प्रमद बर’ बिथांआ खन 6 हादोरसानि गिबि मनट्रीजों सावरायबाय, आरो गुबुन आफादफोराबो गोसोखां बिलाइ जमा होबाय आरो गनायनानैबो लाबाय, नाथाय रावनिबो बिफानआ सरकारि फोसावनाय एबा नटिस होनायखौ सोदांनो नागिराखै, सरकारा बुङो-बेबादि अरदार गैया आरो बेफोर खामानिफोरा जाबाय जाय आयेन दाफुङो बिथांमोनि, अब्ला जों सोरनि खाथिआव थांबावनांगौ, जुदि सरकारा से सप्तानि गेजेराव बे जेंनाखौ बोस्रांआब्ला जों गोख्रों धर्ना होगोन आरो बैफोर जायगाफोराव पन्चायनि बिसायखथिखौ जोंनो खुंफुंगोन” होन्नानै बर’ बिथांआ बुंबावो।
