तेजपुर,नबेम्बर 5: रबिबाराव हादोरसानि गिबि मनट्री सर्बानन्द सनवाल बिथांआ सनितपुर जिल्लानि भुलबारि साहा बागान ओनसोलाव गासै सा 11,500 सो हा गैजायै थागिबि सुबुंफोरनो हानि फोरमान बिलाइ एबा हा पाट्टा होनानै हा होनाय हाबाफारिखौ जागायबाय।
हा पाट्टा होनाय हाबाफारिआ हादोरसानि थागिबि सुबुंफोरनो हा नामजारि खालामना होनानै सुबुंफोरखौ रैखाथि होनो थाखाय हादोरसा सरकारनि मोनसे मावफारिया। गुबुन गुबुन बिफान्नि मनट्रीफोरा हादोरसानि गुबुन गुबुन जिल्लाफोराव हाबाफारि लानानै हा पाट्टा होनाय हाबाफारिखौ जुरिजेनबाय।
हाबाफारिआव गिबि मनट्री सर्बानन्द सनवाल बिथांआ बुङोदि- हादोरसा सरकारा हादोरसानि थागिबि नखरफोरनो फारि फारियै हा पाट्टाखौ होलांबाय थागोन, दुखुनांथाव बाथ्रादि- बोसोर बोसोर बारलांदोब्लाबो हादोरसानि सुबुंफोरा गाव गावनि हानि मोन्नायखौ मोन्नो हायाखैमोन नाथाय दानि हादोरसा सरकारा 2 बोसोर 5 दान मेंनाय गोयै जिरायनाय गोयै खामानि मावनानै हा गैजायै सुबुंफोरनो हा पाट्टा होनायनि लामाखौ स्रां खालामबाय होन्ना बिथां सनवालआ बुंबावो।.
हादोरसानि समायना रमायना गुबुन गुबुन गाबनि गुबुन हारिखौ नोजोर होनानै बिथांआ बुङोदि- मोनफ्रोमबो हारि-हारिसाफोरानो हादोरसा जौगाहोनायाव आखाय दं। साहा बागानियाफोरखौ नोजोर होनानै बिथांआ बुङोदि, साहा बागानियाफोरनि नाजानाय आरो मावनायनि थाखाय हादोरसानि सा बिलाइआ बुहुनाङैनो मिथिजाबाय।