गुबुन हादोरसाफोरनि थाखाय एनआरसी गैया, आसामनि थाखायल’: मिरु सरकार

गोदान दिल्ली,डिसेम्बर 19: मिरु सराकारा गोदान दिल्लीनिफ्राय मंगलबाराव मिथिहोयोदि हादोराव थानाय गुबुन गुबुन हादोरसाफोरनि थाखाय नेशनेल रेजिस्तार अव चिटिजेनसिव (एनआरसी)खौ मावफुंनाय जानाय नङा, एनआरसीआ आसाम हादोरसानि थाखयल’सोमोन।

मिरु सरकारनि हादोरसा मनट्री (Minister of State Affairs) हानस्राज आहिर बिथांआ बुङोदि आसाम हादोरसानि अनगायै मिरु सरकारा गुबुन हादोरसाफोरनि थाखाय एनआरसी मावफुंनायनि खोथा सानाखै। बिथांआ पारलियामेन्टनि जथुमायाव गासे लिरबिदांनि गेजेरजों फोरमायोदि आसाम हादोरसानि थाखाय Citizenship Act, 1955 आरो Citizenship rules, 2003खौ नोजोर होनानै 1951 माइथायनि एनआरसीखौ फोसाबफिन्नो एबा बोखांफिन्नो थाखाय मावफुंनाय जादों।

पारलियामेन्टआव आहिर बिथांनि लिरबिदां होनाया गुबुन हादोरसा फोरावबो एनआरसी लानांगौ होन्नायनि बांद्राय बेरेखा नुनो मोन्नाय जायाखै, गुबैयै बिजेपि सरकारजों दैदेनजानाय हादोरसाफोरखौ, आसाम हादोरसायाव एनआरसीखौ मावफुंजेन्नायनिफ्रायनो गोबां गुबुन गुबुन हादोरसाफोराबो एनआरसीखौ मावफुंनांगौ होन्ना दाबि खालामबोगासिनो दं।

जेब्ला ट्रीनीमुल कंग्रेस राजखान्थि हान्जानि MP प्रासुन बेनारजी बिथांआ सोंथि सोङो, अब्ला बिथांआ बे बाथ्राखौ मिथिहोयो।

फारसेथिं उट्टर प्रदेस हादोरसानि गिबि मनट्री यगी आदीत्यानात बिथांआबो हादोरसायाव एनआरसीखौ मावफुंनागौ होन्ना दाबि खालामबोदों। बिथांआ बुंदोंदि “आयेन बेरेखायै थाफैनाय सुबुंफोरखौ दैथायहरफिन्नो थाखाय एनआरसीखौ मावफुंनाया गोनां”।

ट्रीपुरा हादोरसानि ओनसोलनि गोदान राजखान्थि हान्जा IPFT आबो ट्रीपुरा हादोरसायाव एनआरसीखौ मावफुंनाखौ होन्ना दाबि खालामदों। आरो North East Student Organisation (NESO) फरायसा आफादआबो सा-सान्जा ओनसोलाव थानाय मोनफ्रोमबो हादोरसायावनो एनआरसीखौ सोदांनांगौ होन्ना दाबि खालामदों।

बेबादिनो दिल्लीआव थानाय बिजेपि दोलोआबो हादोरनि राजथावनि दिल्लीआव एनआरसीखौ सोदांनांगौ होन्ना दाबि खालामदों।

मखनो गोनांदि आसाम हादोरसायाव जोबथा आबुं फारिलाइखौ थांनाय 30 जुलाइ 2018 आव फोसावदोंमोन नाथाय हादोरसानि गोबां नोगोरारिफोरनि मुंफोरा नुजायैलाइ दासान्दि मुं सोदांफिन्नाय आरो अजद होनाय खामानिफोरा सोलिगासिनो दं।

मिथिनो मोन्नाय बादिब्ला 30 जुलाइ 2018 आव ओंखारनाय NRC नि जोबथा आबुं फारिलाइआव गोबां सुबुंफोरनि मुंफोरा गोरोन्थि नुजादोंमोन। बेफोर गोरोन्थि जालांनाय मुंफोरखौ सुज्रायनानै लाफिननो थाखाय मोनफ्रोमबो NRC सिबिथाय मिरुफोराव सुफुं बिलाइफोरखौ Offline नि गेजेरजों मावफुंनो थाखाय होगासिनो दं आरो Offline नि गेजेरजों गाव गावनि मुंखौ सुज्रायनानै लानो थाखाय NRC सिबिथाय मिरुआव थांनानै सुफुं बिलाइखौ सुफुंनानै जमा होनांगौ जायो। नाथाय गोजोन्थाव खौरांआ जाबाय गाव गावनि मुंफोरखौ 5 सान्नि गेजेरावनो Online नि गेजेरजों सुज्रायनानै लानो हागोन।

Online नि गेजेरजों गाव गावनि मुंखौ गोरोन्थि गोयै खालामनो थाखाय NRC नि ऑफिशियेल Website www.nrcassam.nic.in आव थांनानै सुफुं बिलाइखौ सुफुंनानै गोरोन्थि गोयै खालामनानै लानो हागोन होन्ना मिथिनो मोन्नाय जायो आरो बे खामानिखौ मावफुंनो थाखाय NRC नि बिबानगिरिफोरा 5 डिसेम्बर 2018 निफ्राय होदों होन्ना मिथिनाय जायो।

फारसेथिं NRC आव गोरोन्थि जालांनाय मुंफोरखौ Online नि गेजेरजों सुज्रायनानै लाफिन्नो थाखाय बेसेबां गोबाव सम होगोन बेनि फार्से NRC नि बिबानगिरिफोरा जेबो मिथिहोथआखै।