Begin typing your search above and press return to search.

गुवाहाटी LGBI बिरखं बाग्रानिफ्राय UDAN स्किमनि बिरखंखौ बेखेवनाया सम लाबावगोन

गुवाहाटी LGBI बिरखं बाग्रानिफ्राय UDAN स्किमनि बिरखंखौ बेखेवनाया सम लाबावगोन

Sentinel Digital DeskBy : Sentinel Digital Desk

  |  29 Dec 2018 8:18 AM GMT

गुवाहाटी,डिसेम्बर 29: हादोरसायाव थानाय अख्रां लामाखौ जौगाहोनो थाखाय मिरु सरकारनि सुबुं बिरखं बिफान (Civil Aviation ) आरो हादोरसा हान्थामेला बिफानआ नाजाबोगासिनो दं। बेबादिनो गुवाहाटी नोगोरमानि साखाथिआव थानाय लखप्रिय’ गफिनात बरदलय इंटारनेशनेल एयारपर्ट (LGBI) बिरखं गाथोननिफ्राय हादोरनांआरि उदान (UDAN) मुंनि बिरखंखौ गुबुन गुबुन खोला एसिया हादोरफोराव दावबायहोनो नाजाबोदों नाथाय बे मावफारियाखौ आबुंङै जाफुंसार जाहोनो थाखाय सम लाबावगोन होन्ना मिथिनो मोन्नाय जायो।

खौरां मोन्नाय बादिब्ला मिरु सरकारनि सुबुं बिरखं बिफाना LGBI बिरखं गाथोननिफ्राय गासै मोन 6 अख्रां लामाजों गुबुन गुबुन एसियान हादोरफोरखौ फोनांजाबहोनो नाजानायनि गेजेराव गासै मोन 2 अख्रां लामानिल’ गनायथि होदों एबा खाबु होग्राफोरा गनायनानै लादों नाथाय गुबुन मोन 4 अख्रां लामानि खाबु होगिरिफोरा ओंखारबोआखै होन्ना मिथिनो मोन्नाय जायो।

हादोरसा हान्थामेला बिफान्निफ्राय खौरां मोन्नाय बादिब्ला गुवाहाटीनिफ्राय बांग्लादेस हादोरनि धाका थांनाय अख्रां लामा आरो बेंकक आव थांनाय अख्रां लामानि खाबु होगिरिफोरा ओंखारबोदों। नाथाय नेपाल हादोरनि कातमान्दु थांनाय, मयनमार हादोरनि यानगन आव थांनाय, सिंगापुर थांनाय आरो मालायसिया हादोरनि खौला लामपुर थांनाय, अख्रां लामानि खाबु होगिरिफोरा ओंखारबोआखै। खौरांआव फोरमायनाय बादिब्ला मिरु सरकारनि सुबुं बिरखं बिफानआ आरोबाव खनसे टेन्डार फोसावनो थांगासिनो दं, जाय खामानिआ गोलाव समनि गोनांथि जायो बेनिखायनो गुवाहाटीनिफ्राय खोला एसियान हादोरफोराव थांनो थाखाय उदान बिरखंखौ आबुङै जाफुंसार जाहोनाया खामानिआ गोबाव सम लाबावगोन होन्ना मिथिनो मोन्नाय जायो।

फारसेथिं मिरु सरकारनि सुबुं बिरखं बिफाना मोन्नै अख्रां लामानि गनायथि आरो Service Provider Company फोरखौ मोन्नायलाय बे मोननै लामाजों थांनाय बिरखंखौ फैगौ 2019 माइथायाव खुंफुंजानो गोनां लख सभा बिसायखथिनि सिगां नङाब्ला बिसायखथि जोबनाय लोगो लोगोनो बेखेवनानै होगोनखौ दिस्पुर सरकारा मिजिं थिदों।

हादोरसा बिरखं बिफाना फोरमायनाय बादिब्ला बे मोन्नै अख्रा लामाजों थांनाय बिरखंआ सानफ्रोमबो थांलाय फैलाय खालामगोन नङाब्ला से सप्तायाव सानथाम थांलाय फैलाय खालामगोन। खाबु होगिरिफोरनि एबा Service Provider Company नि बिबुंथिखौ मोनोब्लासो बेनि फार्से गनायजाथाव बाथ्राखौ बुंनो हागोन होन्ना फोरमायबावो।

हादोरसा हान्थामेला बिफान्नि खमिसनार (नेहाथारि) आसुटस आगनिहट्री बिथांआ सेंन्टिनेलनि खौरांगिरिनि सिगांआव बुङोदि, “हादोरसा सरकारा लखप्रिय’ गफिनात बरदलय इंटारनेशनेल एयारपर्ट (LGBI) बिरखं गाथोनखौ गुबुन गुबुन एसियान हादोरफोरजों फोनांजाबनो नाजागासिनो दं, जाहाथे हान्थामेला बिफान जौगाखांनायजों लोगोसे आसाम हादोरसायाव दावबायारिफोरा दावबायफैनो खाबु मोनो”। जोंहा गुवाहाटी-धाका आरो गुवाहाटी-बेंकक थांनाय लामानि खाबुखौ मिरु सरकारनि सुबुं बिरखं बिफाना होनो आवगायबोदों होन्ना बिथांआ बुंबावो।

मखनो गोनांदि, मिरु सरकार आरो आसाम सरकारनि गेजेराव सावरायनायनि गेजेरजों हादोरनांआरि उदान बिरखंखौ गुवाहाटीनिफ्राय मोन 6 गुबुन गुबुन हादोरफोर फारियै- धाका (बांग्लादेस), कातमान्डु (नेपाल), यानगन (मयनमार), सिंगापुर, बेकक (टायलेन्ड) आरो मालायसिया हादोरनि खौला लामपुर हादोरनांआरि बिरखं गाथोनफोरसिम थांहोनो थाखाय मावफारिया लादों।

उदान बिरखं हादोरनांआरि स्किमनि गेजेरजों मोनफ्रोमबो बिरखंनि मासिनि रां खमायनानै होगोन,बेफोर जाबाय- धाका थांनाय बिरखंनि मेनसे मासिआव 2,370 रां, कातमान्डु थांनाय बिरखंनि मोनसे मासिआव 2,710 रां, बेंकक थांनाय बिरखंनि मोनसे मासिआव 4,400 रां, यांगन थांनाय बिरखंनि मेनसे मासि आव 4,770 रां, खौला लामपुर थांनाय बिरखंनि मोनसे मासि आव 7,350 रां आरो सिंगापुर थांनाय बिरखंनि मोनसे मासिआव 7,780 रां खमायनानै होगोन। बेफोरनि थाखाय आसाम हादोरसानि सरकारआ 100 कौटी रांखौ Viability Gap Funding (VGF) रांनि बाख्रिनिफ्राय बाहायनो साखाफारा होन्ना मिथिनो मोनबावनाय जायो।

Next Story