गुवाहाटी/गोदान दिल्ली,मार्च 11: भारतनि बिसायखथि बिफान एबा इलेक्शन खमिसन ऑफ इंन्डीया (ECI) आ 2019 माइथायाव खुंफुंजानो गोनां लख सभा बिसायखथिनि समखौ फोसावनानै होनाय लोगो लोगोनो मोन 6 हारिनि दैदेनगिरिफोरा सेडियुल ट्रायब बिमुंनि दाबिखौ लानानै गोदान दिल्लीआव थानाय कंग्रेज राजखान्थि दोलोनि मावख’आव थांनानै राहुल गान्डी बिथांजों सावरायहोयो
खौरां मोन्नाय बादिब्ला बिथांमोनहा मोन 6 हारिनि सेडियुल ट्रायब बिमुंनि दाबिखौ सुफुंनानै होनो थाखाय राहुल गान्डी बिथांखौै दिनै (11 मार्च 2019) खावलायहोयो।
आसामनि मोन 6 हारिसाफोरा जाबाय फारियै- चुतीया, मटक, मरान, कछ-राजबंसि, टाय अहम आरो टी-ट्रायब एबा आडिवासि, बिथांमोनहा ट्रायबेल माहारिनि आखुथायफोर गैयाब्लाबो गोबाव समनिफ्रायनो ट्रायबेल बिमुंनि दाबि खालामबोगासिनो दं।
“सेडियुल ट्रायब एबा ट्रायबेल बिमुंनि गनायथि होनाया राजखान्थियारि जेंना, मानोना बेयो जोंनि मोन्थाय। बिसायखथिनि उनाव, जायखि दोलोआनो गोहोआव फैयामानो, बिथांमोनहा जोंनो ट्रायबेल बिमुंनि गनायथि होनांगौ” होन्ना मोन 6 दोलोनि दैदेनगिरिफोरा बुङो।
“जों राहुल गान्डी बिथांखौ गोसोखांहोफिनदों, मानोना थांनाय 2014 माइथायाव सेडियुल ट्रायब बिमुंनि गनायथि होनाया कंग्रेज दोलोनि मोनसे बिसायखथिनि खोथा होनायमोन। बिजेपि दोलोआ गोहोआव फैदोंब्लाबो दाबिखौ सुफुंनानै होआखिसै, जुदि कंग्रेज दोलोआ गोहोआव फैयोब्ला मोन 6 हारिनि दाबिखौ सुफुंनानै होनांगौ, राहुल गान्डी बिथांआ बाथ्राखौ सान्नानै नायगोन होन्ना खोथा होदों” होन्ना मोन 6 हारिनि दैदेनगिरिफोरा बुङो।
मखनो गोनांदि, मिरु सरकारनि नखर बिफान्नि मंत्री राजनात सिंह बिथांआ थांनाय जानुवारि दाननि 9 अक्ट’आव पारलियामेन्टनि राज्य सभानि जथुमायाव आसाम हादोरसानि मोन 6 हारिसाफोरखौ सेडियुल ट्रायब एबा ट्रायबेल बिमुंनि गनायथि होनो थाखाय The Constitution (Scheduled Tribe) Order (Amendment) Bill, 2019 खौ थिसनदोंमोन, नाथाय राज्य सभानि हाउसआव बिलखौ गनायथि होआसै आरो सावरायनाय जायासै।
मिरु सरकारनि बिथांखि बादियै आसामनि मोन 6 हारिसाफोरनो सेडियुल ट्रायब एबा ट्रायबेल बिमुंनि गनायथि होनो थाखाय The Constitution (Scheduled Tribes) Order (Amendment) Bill, 2019 खौ राज्य सभानि जथुमायाव थिसन्नाय लोगो लोगोनो आसामनि थाखानाय ट्रायबेल माहारिफोरनि गोसोआव रागा जोंखांनाय लाबोदोंमोन। मोन 6 गोजौ थाखोनि आरो गोबां सुबुं सानखो थानाय हारिसाफोरनो ट्रायबेल बिमुंनि गनायथि होनो नागिरनायखौ मिरु बर’ फरायसा आफादआबो हेंथा खालामदों।