चरायदेव जिल्लायाव हाथियारजों लोगोसे सानै दुथांखौ हमनो हायो

चरायदेव जिल्लायाव हाथियारजों लोगोसे सानै दुथांखौ हमनो हायो

जयसागड़,डिसेम्बर 18: रबिबारनि मोनायाव चरायदेव जिल्लानि कानुबारि ओनसोलाव भारतीय’ आर्मि बिफान्नि दाव बिफाना सानै दुथांखौ हमनो हायो। आसाम-अरुनाछल प्रदेस सिमायाव थानाय कानुबारि ओनसोलाव आर्मि बिफाना समबादियै संनायाव बिथांमोनखौ हमनो हायो। हमजानाय दायनिगिरिफोरखौ सानैबो अरुनाछल प्रदेस हादोरसानि रेम बेहुम (32) आरो टेज’ अझुम (27) होन्नानै सिनायथि मोनो।

खौरां मोन्नाय बादिब्ला बिथांमोनिफ्राय गंनै रायफलजों लोगोसे गर 60 गोथां गुलि आरो सनदेहयै गुलिनि फाउदारबो मोनदों होन्ना मिथिनो मोन्नाय जायो। आर्मिनि दोलोआ बिथांमोनखौ चरायदेव जिल्लायाव थानाय खाथिनि सापेकाटी पुलिस थानायाव लानानै फैदों होन्ना मिथिनो मोनबावनाय जायो।

फारसेथिं सिबसागड़ जिल्लानि हालवाटीं पुलिसआ स्टेट बेंक अव इन्डिया बेंकनि एटीएम (ATM) निफ्राय रां कावनाय जाथायजों लोब्बा थानाय गासै सा 7 सो सिखावफोरखौ हमो। खौरां मोन्नाय बादिब्ला सिखावफोरा सिबसागड़ जिल्लानि टीवक आरो आमगुरि टाउनाव थानाय गंथाम एसबीआइ एटीएमनिफ्राय थांनाय सान्नैसो सिगां रां खावदोंमोन।

हमजानाय सिखावफोरखौ फारियै- पंकज दले (माजुलि), मिन्टु राय (गुवाहाटी), लाकि पेगु (नर्ट लक्किमपुर), पाथुल आलि (नलबारि), राहुल हाजरिका (गलाघात), सानजिब दले (नर्ट लक्किमपुर), आरो आदिल आलि (नलबारि) होन्ना सिनायथि मोन्नाय जायो।

बिथांमोनजों लोगोसे गंसे मारुटी भेन नं AS-14-H-6433 गारिखौबो मोन्नो हायो, जाय गारिखौ बिथांमोनहा गुबुन गुबुन जायगाफोराव सिखाव खावनाय खामानिआव बाहायगासिनो दंमोन। सिबसागर जिल्लानि ACJM कोर्डआ बिथांमोनखौ समबारनिफ्राय 12 सान जुडिसियेल कास्टुडीआव दोनदों होन्ना मिथिनो मोनबावनाय जायो।

बुंनो थाङोब्ला बिथांमोनहा फिसा फिसौ सिखाव नङा। बिथांमोनहा हादोरसानि गुबुन गुबुन जिल्लाफोराव सिखाव खावनायजों लोगोसे हादोरसानि साखाथि फाखाथि थानाय गुबुन हादोरसाफोरावबो सिखाव खावनाय खामानिजों लोब्बा दंमोन होन्ना मिथिनो मोनबावनाय जायो।

गोथौवै सान्नो थाङोब्ला बेफोरबादि खामानिआ बिथांमोनि गोरोन्थि बुंद्रायोब्लाबो गोरोन्थि जागोनखौ आं सानो। थांनाय 10 बोसोरनि उन्निफ्राय सिखाव खावनाय हाबाफोरा खमायबोदोंमोन नाथाय दासान्दि गोबां लाइमोनफोरानो साख्रि गैयै आरो सरकारनि नाजायै आखुथायाव लाइमोनफोरा गुबुन हादोरसाफोराव थांनानै मालाइनि बान्दा जाहैनो गोनां जादों, देहायारि फालांगिआ बांबोनो हमदों, सोरनिबा आफादआ सोरनिबा मुं लानानै रां दाबि खालामदों आरो गाव गावनि आयथिंआव सुंथाना थानो थाखाय गिलु बालु खामानिफोरखौबो मावनो गियैखौ नुनो मोनबोनाय जादों।

मखनो गोनांदि थांनाय नै बोसोरसो सिगांनिफ्राय मन्दिर आरो साट्राफोरनिफ्राय सना रुफा खावनायफोराबो बांनायनिफ्राय बांबोदों जायनि जाहोनाव थांनाय सप्तानिफ्राय हादोरसायाव थानाय मोनफ्रोमबो जिल्ला खुंथाय आरो डिपुटी खमिसनारफोरनो मन्दिर आरो गुबुन धोरोम सिबिसालिफोरखौ खमिटि दानानै नोजोर होनो हादोरसा सरकारा बिथोन हरदों।

Related Stories

No stories found.
logo
Sentinal Assam
bodo.sentinelassam.com