गुवाहाटी,नबेम्बर 7: हादोरनि गुबुन गुबुन हादोरसाफोरजों रुजुनानै नायोब्ला आसामा जौसिन फारिलाइआव, नाथाय गोरोन्थि जाहोन्नि थाखाय- 26 अक्टबरसिम हादोरसायाव जापानिस एन्चाफालिटिस बेरामनि जाथाय आरो थैनाय सुबुंआ हादोरसायाव गासै सा 94 जाबाय।
मानि थाखाय हादोरसायाव बेफोरबादि जानो मोनखो? सिगांग्रो बिजि थुनाय एबा मुलि दौनायाल’ जापानिस एन्चाफालिटिस बेरामखौ होबथानो हानाय मोनसे राहा। नाथाय हादोरसानि नंगुबै बाथ्राया जाबाय बैसो जानाय सुबुंफोरनि थाखाय गुबैयै हादोरसानि गासै मोन 8 जिल्लाफोराव मुलि मोन्नो थांआ। जिल्लाफोरा जाबाय पारियै बाक्सा, चिरां, धुबुरि, गवालपारा, हायलाखान्डि, करिमगन्ज, दिमा हासाव आरो कार्बि आंलं। बेजों लोगोसे हादोरसानि मोन 9 गुबुन गुबुन जिल्लाफोरावबो थासारिआ मोजां नङा, जाय जिल्लाफोराव 70 जौखोन्दोनिबो खमसिन मुलिफोरखौ मोन्नाय जायो। जापानिस एन्चाफालिटिस बेराम होबथानो थाखाय मुलि दैथायनाय हाबाफारिआ थिनसुकिया जिल्लायाव 63%, सिबसागड़ जिल्लायाव 68%, कामरुप जिल्लायाव 66%, नगाव जिल्लायाव 46%, बरपेता जिल्लायाव 65%, उदालगुरि जिल्लायाव 53%, नलबारि जिल्लायाव 48%, बंगाइगांव जिल्लायाव 50% आरो मरिगांव जिल्लायाव 48%।
बैसो जानाय सुबुंफोरखौ जापानिस एन्चाफालिटिस बेरामनिफ्राय होबथानो थाखाय हादोरसायाव 2012-13 माइथायनिफ्रायनो मावफारिया लादोंमोन। नाथाय दुखुनांथाव बाथ्राया जाबाय, नेसनेल भेक्टर बर्न दिजिस कन्ट्रल प्रग्राम (NVBDCP) निफ्राय खौरां मोन्नाय बादिब्ला हादोरसानि मोनफ्रोमबो जिल्लाफोराव मुलि दैथायहरनाया मोनसेबो जिल्लायावनो 100 जौखोन्दो जाफुंसार जायाखै।
खौरां मोन्नाय बादिब्ला हादोरसायाव थांनाय नै बोसोर सिगांनिफ्रायनो हादोरारि जापानिस एन्चाफालिटिस बेराम नायनो गोरों रावबो फैयाखै। माखैसे सुबुंफोरनि गेजेराव जापानिस एन्चाफालिटिस बेरामखौ मोनबावदों आरो दासान्दि फाहामथाय होगासिनो दं होन्ना मिथिनो मोनो।
सोलिफुं बोसोरनि 26 अक्टबरसिम हादोरसायाव गासै 488 जापानिस एन्चाफालिटिस बेरामजों फुगिनांनाय सुबुंखौ मोन्नो हादों। बेनिनो गासै सा 94 बेरामजों फुगिनांनाय सुबुंफोरा जिउ गोमानाङो। मोनसे जिल्लायाव सा 15 यै सनितपुर आरो दिब्रुगड़ जिल्लायाव बांसियै जापानिस एन्चाफालिटिस बेरामजों जिउ गोमानांदों आरो कामरुप जिल्लायाव थैनाय सुबुंआ सा 10 जाबाय होन्ना खौरां मोनो।
हादोरसानि जाय जिल्लाफोराव 70 जौखोन्दोनि खम मुलि हरनाय जादों बैफोर जिल्लाफोराव बांसिनै मुलि एबा फाहामथायनि राहा दैथायहरनो थाखाय NVBDCP आ मिरु सरकारखौ हांख्रायहरनो थांगासिनो दं होन्ना खौरां मोनबावनाय जायो।