जुमाइ बानायनो बाहायनाय एमाव दिहुन्नायखौ गिबि मंत्री सनवाल बिथांआ बन्द’ खालामनो खावलायदों
गुवाहाटी,मार्च 5: थांनाय दानाव आसाम हादोरसानि सिङाव थानाय गलाघात आरो जरहात जिल्लाफोराव जुमाइ लोंनानै सा 100 निबो बांसिन हिन्जाव आरो हैवाफोरनि बेसेनगोसा जिउ खहा जालांनायनि हेंथायै गोख्रों राहा नागिरनानै हादोरनि गिबि मंत्री सर्बानन्द सनवाल बिथांआ जुमाइ बानायनायाव नांगौ जानाय एमाव दिहुन्नायखौ बन्द’ खालामनो बिथोन होदों।
गिबि मंत्री सनवाल बिथांआ गोजौ थाखोनि जथुमा लिथुमनानै सावरायखांनायनि उनाव हादोरसानि गाहाय नेहाथारि अलक कुमार बिथांखौ हादोरसायाव एमाव दिहुन्नायखौ बन्द’ खालामनो बिथोन होयो। एमाव दिहुन्नायखौ बन्द’ खालामनाया गोनां, मानोना एमावखौ गोबां बिस गोनां जुमाइ दिहुन्नायाव बाहायबोगासिनो दं, जाय जुमाइखौ दैजों गलायाजासे थोंजोङै लोंनाय जायो। हादोरसानि मोनफ्रोमबो जिल्लाफोराव एमाव दिहुन्नायखौ बन्द’ खालामनो थाखाय गाहाय नेहाथारि बिथांखौ मोनफ्रोमबो जिल्ला खुंथाय एबा डिपुटी खमिसनारनि मावख’आव बिथोन हरनो खावलायो।
हादोरसानि गिबि मंत्री बिथांआ हादोरसा गाहाय नेहाथारि बिथांखौ जिल्ला खुंथायाव बिथोन हरनो खावलायनायजों लोगोसे साहा बागान ओनसोल आरो खाथि खालानि ओनसोलफोरावबो बिस गोनां जुमाइ लोंनायनि सायाव सांग्रांथियारि मेल खुंफुंनो थाखाय बिथोन हरनो खावलायबावो, जाहाथे बैफोर जेंना गोनां जाथायफोरनिफ्राय जानगाराव थाहोनो हायो।
बावैसो सिगां बिस गोनां जुमाइ मोनलोंनानै बेसेनगोसा जिउ गोमालांनाय सुबुंफोरनि थालांनाय गथ-गथायफोरखौ आसाम सरकारा Juvenile Justice Act आयेन मथौ नायलांनो गोजौ थाखोनि जथुमानि गेजेरजों थाखि लाबावो।
टी-ट्रायब जौगाखां हादोरसानि मंत्री पल्लब लचन दास, गिबि मंत्रीनि आयेन बोसोनगिरि सान्तानु भारालि, हादोरसा गाहाय नेहाथारि अलक कुमार, लेबर बिफान्नि लोगो गाहाय नेहाथारि जिस्नु बरुवा, गिबि मंत्रीनि प्रिन्चिपाल नेहाथारि सन्जय लहिया आरो रिभेनिउ बिफान्नि माखासे गेदेमा बिथांमोन लोगोसे आसाम एक्साइस बिफान आरो लेबर बिफानफोरनि गेदेमा बिथांमोनहाबो जथुमायाव नुजाथिदोंमोन होन्ना खौरां मोन्नाय जायो।
