जुमाइ लोंनानै सा 69 सुबुंनि जिउ खहा आरो बांलांगासिनो दं

जुमाइ लोंनानै सा 69 सुबुंनि जिउ खहा आरो बांलांगासिनो दं

गलाघात,फेब्रुवारि 23: दुखुनांथाव जाथाय, ब्रिहस्पथिबारनि मोनायाव गलाघात आरो जरहात जिल्लाफोरनि साहा बागान ओनसोलाव जायगायावनो बानायजानाय जुमाइ एबा फेग्रा मुवा लोंनानै गोमोथावै सा 69 सुबुंफोरा जिउ जोबथा हां बोयो आरो गोबां सुबुंफोरखौ देहाफाहामसालिआव थिसन्नो गोनां जायो।

सालमारिया साहा बागान ओनसोलनि गासै सा 28, मेरापानि ओनसोलनि गासै सा 4 गासै सा 80 निबो बांसिन सुबुंफोरखौ स्वाहिद कुसल कनवार सुबुं देहा फाहामसालि आरो जरहात मेडिकॉल कॉलेज आरो देहा फाहामसालिआव थिसन्नो गोनां जायो। मिथिनो मोन्नाय बादिब्ला बिथांमोनहा ओनसोलावनो बानायनाय जौ एबा जुमाइखौ लोंदोंमोन।

खौरांआव फोरमायनाय बादिब्ला ब्रिहस्पथिबारनि मोनाब्लि समाव साब्रै हाबा जाखानाय आयजोफोरा खर’ सानानै लोमजादोंमोन आरो गोबागासिनो दंमोन। दसे समनि उनाव बिथांमोनखौ स्वाहिद कुसल कनवार सुबुं देहा फाहामसालिआव दैथायहरनो गोनां जायो। नाथाय देहा फाहामसालि मोनहैनायनि सिगां लामायावनो बिथांमोनहा साब्रैबो जोबथा हां बोदों।

सुक्रबारनि मोनाब्लि समसिम जिउ गोमानांनाय सुबुंफोरा गासै सा 32 जाबायमोन। थैनाय साब्रै सुबुंफोरखौ मेरापानि ओनसोलाव थानाय गमारिगुरि आदर्स गामि आरो गबिन्डाफुर गामिनि मनिराम दात्ता (40), कमल गगय (50), ललित गगय (30) आरो पापु बरा (40) होन्ना सिनायथि मोन्नाय जायो। बिथांमोनहा बिस गोनां जुमाइखौ मोनलोंनानै जिउ खोमानो गोनां जायो।

सा 47 सो देहा गाज्रि जालांनाय सुबुंफोरखौ जरहात मेडिकॉल कॉलेज आरो देहा फाहामसालिआव दैथायहरनो गोनां जायो। सुक्रबारनि मोनाब्लिआव जरहात मेडिकॉल कॉलेज आरो देहा फाहामसालिआव थिसन्नाय सा 6 सुबुंफोरखौ जिउ जोब्बाय होन्ना देहा फाहामगिरिआ फोसावनानै होबायमोन। थैनाय सुबुंफोरखौ द्रपदि अरां, सान्ती पुजर, दुलाल उरां, सान्जु उरां, बेल भुमिज, अग्नि ग्वाला, सुबलाल पुजर, बधिरा उरां, करकरिया गवाला, कार्टिक घातवार, सुनिता पुजर, हुगलाल कुजुर, बयन्दान बवारि, आरो बिनती भाक्ता होन्ना सिनायथि मोन्नाय जायो। बिथांमोनहा साफ्रोमबो हालमिरा साहा बागाननि थागिरि होन्ना मिथिनो मोन्नाय जायो।

गलाघात जिल्ला जुगिबारि ओनसोलनि गुबुन सा 3 सुबुंफोर- सरेन गगय, सुनेस्वर गगय आरो आनान्द गगय बिथांमोनखौबो बिस गोनां जुमाइ लोंनानै थैबाय होन्ना मिथिनो मोनबावनाय जायो।

गलाघात जिल्ला AATTSA एबा सान्टालि फरायसा आफादनि जिल्ला नेहाथारि जगदिस बराइक बिथांआ बुङोदि, गलाघात जिल्ला खुंथायनि नोजोर होयै आरो एक्साइस बिफान्नि नोजोर होयैआव हालमिरा साहा बागान ओनसोलाव बोफोरबादि जाथाया जानो मोनदों आरो थैनायजों मोगा मोगि जानो गोनां जादों। हालमिरा ओनसोलनि सुबुंफोरा बुङोदि, ओनसोलावनो बानायजानाय जुमाइफोरखौ (सुलाइ) कुमटाइ बियाबनि सिङाव थानाय काथिनि चेलेंगि गामिनिफ्राय हालमिरा ओनसोलाव लाबोनाय जायो आरो गोबां साहा बागानियाफोरा गाव गावनि न’फोराव दोनथुमो।

टाहा मुक्ती संग्राम समितिनि दैदेनगिरि अमित नाग बिथांआ बुङोदि, कुमथाइ बियाबनि सिङाव आयेन बेरेखायै जुमाइ (सुलाइ) फोरखौ बानायो आरो ओनसोलनिफ्राय गोसारहोयो। MLA म्रिनाल सायकियानि आंगो गामि जुगिबारि आरो चेलेंगि गामिफोराव गोबां आयेन बोरोखायै सुलाइ बानायो होन्ना बिथांआ मिथिहोबावो।

साहा बागानियाफोरनि गुबुन गुबुन आफादफोरा गलाघात जिल्ला एक्साइस बिफान्नि नाइदिंगिरि (इन्सपेक्ट) बिथांखौ बोख्लायनांगौ होन्ना दाबि खालामो। बिथांमोन थैनाय सुबुंफोरनि नखराव 1 लाख रांनि अनसुंथाय होनांगौ होन्नाबो दाबि खालामबावो।

थैनाय अनजिमाया बांलांगासिनो दं, बावैसो खौरां मोनबावनाय बादिब्ला गासै सा 86 सुबुंफोरनि जिउ खहा जाबाय आरो बांलांनो हागौ होन्ना सनदेह खालामनाय जादों।

logo
Sentinal Assam
bodo.sentinelassam.com