गाहाय रादाब

जोंनि दाबिखौ गनायाब्ला जोंखौ नागिरनो हाग्रायाव थांनांगोन: AASAA

दाबिखौ

क’कराझार,फेब्रुवारि 9: आडिवासि माहारिनो सेडियुल ट्रायब (ST) बिमुंनि दाबि खालामानै दुलाराय आडिवासि फरायसा आफाद एबा All Adivashi Students’s Association (AASA)आ सुक्रबारखालि क’कराझार आव हान्जा सुरनाय हाबाफारि लायो। बिथांमोनहा क’कराझार जिल्लानि सिङाव थानाय गौरां दैमानि साखाथिजों हान्जा सुरनानै बिजेपि सरकारनि बेरेखायै स्लगान होयजों लोगोसे नो एसटी नो रेस्त, उइ अनान्त एसटी, एसटी आवार लिगेल डिमान्ड होन्नानै बुङो।

आडिवासि फरायसा आफादआ आसाम हादोरसानि सिङाव थानाय आडिवासि माहारिनि मोनफ्रोमबो हारिसाफोरखौ एसटी एबा ट्रायबेल खालामना होनांगौ होन्ना बिजेपि दैदेननाय सरकारनि खाथिआव दाबि दैखांदों। बिथांमोनहा फैगौ लख सभा बिसायखथिनि सिगांनो दाबि खालामनायखौ सुफुंनानै होआब्ला बिजेपि दोलोनि दैदेनगिरिफोरखौ आसामनि मोनफ्रोमबो साहा बागान, साहा बागाननि गामिफोराव हाबनो नागिरनायनि सिगांनो होसोहरगोन होन्नानै बुङो

मखनो गोनांदि, आडिवासि फरायसा आफादआ थांनाय बुधबारखालि क’कराझार जिल्ला डिपुटी खमिसनारनि मावखनि खाथिआव थानाय चिलड्रेन पार्कआवबो सेडियुल ट्रायब (ST) बिमुंनि दाबि खालामनानै 3 घन्टा जिरायना धर्ना होदोंमोन आरो आडिवासि माहारिनो एसटी होनांगौ होन्ना दाबि खालामदोंमोन।

साहा बागानिया हारिनि गोबां सुबुंफोरा आखायाव प्लेकार्ड आरो कार्टुन लानानै धर्ना होनायजों लोगोसे सेडियुल ट्रायबनि दाबिखौ लानानै क’कराझार डिपुटी खमिसनारनि सिजों हादोरनि गाहाय मंत्री नारेन्ड्र मोडी आरो हादोरसानि गिबि मंत्री सर्बानन्द सनवाल बिथांमोननो गोसोखां बिलाइ दैथायहरदों होन्नानैबो खौरां मोनबावनाय जायो।

दुलाराय आडिवासि फरायसा आफादनि लेङाइ आफादगिरि रजेन हह बिथांआ खौरांगिरिफोरनि सिगांआव बुङोदि, आडिवासि हारिनि  बेन्दोंजों नांजाबनानै थानाय अरान, मुन्डा, सान्टाल, कारिया, गन्ड, सावरास आरो गुबुन गुबुन हारिसाफोरखौ सेडियु ट्रायबनि फारिलाइआव थिसन्नायनि दाबि खालामबोनाया गोदान नङा। बिथांमोनखौ सेडियुल ट्रायबनि फारिलाइआव थिसननांगौनि समा फैबाय मानोना भारतनि गुबुन गुबुन हादोरसाफोराव थानाय बिदा फंबायफोरा ट्रायबेल बिमुंनि गनायथि मोन्नाय होन्नानै बिथांआ बुंबावो।

जोंनो ट्रायबेल बिमुंनि गनायथि होयोब्ला थाखानाय ट्रायबेल सुबुंफोरनि जेबो खहा जाया, जों बिथांमोनजों गोरोबनानै राज्यो जागोन, आरो बेनि थाखाय जोंनि थाखानाय OBC खोटाखौ बोखांनानै लाबोनो लाहोन होन्नानै बिथांआ बुंबावो।

जुदि दाबिफोरखौ सुफुंनानै होआ अब्ला सोमावसारनायखौ गोख्रोंनिफ्राय गोख्रोंसिन खालामलांगोन आरो मावफुंनो गोसो गैयाब्ला आडिवासि आरो लाक्रा हारिनि दैदेनगिरिफोरखौ गामिआव मोन्नाय नङा नाथाय नागिरनो थाखाय हाग्रायावसो थांनांगोन होन्ना बिथांआ सरकारखौ हुमखि होबावो।