गुवाहाटी,अक्टबर 8: थांनाय कंग्रेज सरकारनि खुंथायाव थानाय समाव National Food Security Act (NFSA) नि सिङाव खाबु मोनगिरिफोरनि मुंखौ राजखान्थियारि बिथिंखौ नोजोर होनानै नंखाय आरो खाबु मोनथावै सुबुंफोरनि मुं सायखनायफोरखौ थांनाय सनिबाराव दिस्पुर सरकारा खाबु मोनगिरि फारिलाइनिफ्राय 2.83 लाख मुंफोरखौ दानखफिन्नो गोनां जायो। जायनि जाहोनाव नंगुबै आरो खाबु मोनथाव सुबुंफोरा नाथ्रोदना दोनजादों आरो खाबु मोन्नो हायाखैमोन।
खाबु मोनथावै सुबुंफोरा रेसन कार्डनि गेजेरजों खम बेसेनावनो माइरं आरो गुबुन गुबुन गोनां बेसादफोरखौ बायनानै खाबुफोरखौ लागासिनो दंमोन। फारसेथिं दानि दिस्पुर सरकाराव माकासे इ-रिगुलारफोरखौ नुनानै नायबिजिरो आरो खाबु मोनगिरिफोरनि फारिलाइखौ गोरोन्थि नुनो मोनो। बेफोर गोरोन्थिफोरखौ बोखारनो दिस्पुर सरकारा गासै 2.83 लाख नंखाय खाबु मोनगिरिफोरनि मुंफोरखौ दानख’नानै गासै 2.80 लाख नंगुबै आरो थार खाबु मोनगिरिफोरनो गोदान कार्ड दिहुनफिनो।
बेखौ लानानै सान्नो गोरों सुबुंफोरनि गोसोआव सोंथि बेरखाङोदि, हादोरसायाव माबोरै नंगुबै आरो खाबु मोनथाव सुबुंफोरनि मुंखौ दोन्नानै एसेबां गोबां नंखाय सुबुंफोरनि मुंफोरा फारिलाइआव नुजादोंमोन? खौरां मोन्नाय बादिब्ला कंग्रेज सरकारनि समाव NFSA नि सिङाव खाबु मोनगिरिफोरनि मुं सायखनाया रांजखान्थियारि बिथिंखौ नोजोर होनानै सायखनाय जादोंमोन आरो नंगुबै थार खाबु मोनगिरिफोरनि मुंफोरखौ नाथ्रोदना दोनदोंमोन।
National Food Security Act नि बादिब्ला आसामाव गासै 2.52 कौटी सुबुंफोरा रेसन कार्ड मोन्नांगौ। नाथाय दासिमबो हादोरसायाव बे आयेननि गेजेरजों 2.48 सुबुंफोरनोल’रेसन कार्ड होनाय जादों। थाबावनाय 4 लाख खाबु मोनगिरिफोरनि मुंफोरखौ सायखनो थाखाय आसाम सरकारा दिपुटी खमिसनारफोरखौ सायखनो थाखाय बिथोन हरबाय होन्ना खौरां मोन्नाय जायो।
फार्सेथिं कंग्रेज सरकारनि समाव 2.83 लाख नंखाय सुबुंफोरनि मुंफोरखौ सायखनाय अफिसारफोरनि बेरेखा गोख्रों आयेन लानायखौ सरकारा दोनथनो गोनां जाबाय। मानोना बिथांमोनहा बुङोदि, खाबु मोनगिरिफोरनि मुंफोरा पन्चायट आरो ब्लकनिफ्राय फैदों। बिथांमोनखौ हमनो हानाया गोब्राब खामानि होन्नानै खुंथायनिफ्राय मिथिहोयो।