दुलाराय आसाम फरायसा आफादआ एजिपि-बिजेपि गोरोबथा जानायखौ गोजोन्नाय मोनाखै

गुवाहाटी,मार्च 13: दुलाराय आसाम फरायसा आफादनि बोसोनगिरि ड: सामुज्जल बाटाचार्य आरो गाहाय नेहाथारि लुरिन ज्यती गगय बिथांमोनहाबो एजिपि-बिजेपि गोरोबथा जाफिन्नायखौ बुधबाराव गोख्रों रावजों सोंखारियो। “जेंना गोनां नोगोरारि सोदांनाय बिल 2016 खौ लानानै ओनसोलनि एजिपि दोलोआ नाटकसो खालामदों” होन्ना बिथांमोनहा बुङो।

एजिपि दोलोआ हादोरसानि सुबुंफोरनो मिथिहोनांगौदि बिथांमोनहा मानि थाखाय बिजेपि दोलोजों गोरोबथायाव थाफिनखो, बिजेपि दोलोआ जुदि गोहोआव फैयोब्ला नोगोरारि सोदांनाय बिल 2016 खौ थिसनगोन होन्ना लाइजामनि गेजेरजों आरो खुगाजों बुंनायफोरखौ मिथिखानानै मानो थांफिनदों”, होन्ना ड: सामुज्जल बाधाचार्य बिथांआ बुङो। “एजिपि दोलोआ हादोरसानि सुबुंफोरखौ गोहो उखैनाय मोन्नानै नेवसिबाय” होन्ना फरायसा आफादनि नेहाथारि लरिन ज्यती गगय बिथांआबो बुङो।

फारसेथिं बिथांमोनहा बुंबावोदि, “जेंना गोनां नोगोरारि सोदांनाय बिल 2016 खौ सा-सान्जा फरायसा आफादजों लोगोसे हेंथा खालामलांबाय थागोन”।