कहिमा,डिसेम्बर 29: संबिजिरनि आयेन बादियै नागालैन्ड हादोसायाव थानाय मोन 6 गुबुन गुबुन नागा हारिनि आफादफोरजों दाफुंजानाय इस्टान नागालेन्ड पिपल्स अर्गेनायजेसन (ENPO) नि दाबि बादियै नागालेन्ड हादोरसानि सिङाव आलादा राज्योनि दाबिनि सायाव सावराज्लायगोन होन्ना मिरु सरकारा खोथा होयो।
थांनाय दानाव मिरु सरकारनि स्पेसियेल सेक्रेटारिनि दैदेन्नायाव ENPO, नागालेन्ड सरकार आरो मिरु सरकारनि नखर (MHA) बिफान्नि गेजेराव थाम खनायारि सावराज्लायदोंमोन होन्ना मिथिनो मोन्नाय जायो।
ENPO नि गाहाय आफादगिरि खैवाग कनायक बिथांआ बुङोदि, ENPO नि दाबि आरो राजखान्थिआरि जेंनाया गुबुन नागा फोलेरनिफ्राय आलादा रोखोमनि, जायनि थाखाय NSCN-IM उदखारि दोलोआबो जेंनाखौ सुस्रांनो सान्नानै गोदान मोनसे आफाद जोनोम मोनदोंमोन। नागा फोलेरनि गुबुन गुबुन हारिफोर फारियै चांग, कनायक, खियामनिउगान, फम, सांगथाम आरो यिमचुंगजार हारिनि नागाफोरा गुबुन नागा फोलेरनि गुबुन होन्ना बिथांआ बुंबावो।
थांनाय सेप्तेम्बर दानाव मिरु सरकारनि नखर बिफाना माखासे जौगाखां मावफारियानि गेजेरजों रांनि अनसुंथाय (Development Package) हरनो थाखाय राजि जादोंमोन नाथाय ENPO नि दोलोआ बेफोरखौ आलादा राज्योनि दाबि खालामनाय समाव गोनांथि गैया सान्नानै गनायनानै नाजावाखैमोन होन्ना मिथिनो मोन्नाय जायो।
बावैसो सिगां ENPO आरो हादोरसा सरकारनि गेजेराव बे दाबिखौ लानानै खन 2 सावरायनाय जाबाय आरो मिरु सरकार, नागालेन्ड सरकारजों थाम खनायारि सावरायनाया गोबां खेब जालांबाय होन्ना मिथिनो मोनबावनाय जायो।
मखनो गोनांदि, इस्टान नागालेन्ड पिपल्स अर्गेनायजेसन (ENPO) आफादआ गोबाव समनिफ्रायनो नागालेन्ड हादोरसानि सिङाव थानाय मोन 4 जिल्लाफोर फारियै- टुयेनसांग, मन, लंलें आरो किफिरे जिल्लाफोरखौ बुखावनानै आलादा राज्यो दाफुंनो दाबि खालामबोगासिनो दं।
बिथांमोनहा थांनाय 25 नवेम्बर 2010 माइथाय आव हादोरनि बार्ग गाहाय मंत्री मनमहन सिंह बिथांनो गिबिआवनो गोसोखां बिलाइ गथायदोंमोन आरो मिरु सरकारआ नागालेन्ड हादोरसानि सरकारखौ बिथांमोनि दाबिनि सायाव नायनो खावलायहरदोंमोन।
मिरु सरकारनि नखर बिफान्निफ्राय मिथिहोनाय बादिब्ला नागालेन्ड हादोरसानि सिङाव आलादा राज्यो दाफुंनायजों जेंना सुस्रांजाया नाथाय सराका नागालेन्ड हादोरसानि सान्जा फारसे थानाय मोन 4 जिल्लाफोरखौ लानानै आलादा औटनमास काउनसिल दाफुंना होनायखौ गनायगोन होन्ना मिथिनो मोनो।
बावैसो मिरु सरकार आरो ENPO नि गेजेराव सावरायज्लायनायाव बिथांमोनहा मिथिहोयोदि, ENPO आ संबिजिर आव लिरनानै दोनजानाय 372-A (2) दफानि आयेन बादियै आलादा राज्यो दाबि खालामबोगासिनो दं आरो बिथांमोनहा बुंबावोदि, “नागालेन्ड हादोरसानि सान्जा फारसे थानाय जिल्लाफोराव गोबां जारिमिनारि गोजोरथि दं, नाथाय जेबो जौगाखां खामानि मावफुनाय जायाखै जायनि थाखाय थाबैनो नोजोर होजानांगौ”।