नोगोरमायाव थानाय ट्रायबेलफोरनि हाखौ फालांगिरिफोरनो हगारनो नागिरदों: टिवा आफाद

गुवाहाटी,सेप्तेम्बर 12: दुलाराय टिवा फरायसा आफाद(ATSU), टिवा युवा चात्र परिसद(TYCP), दुलाराय टिवा रैखाथि आफाद(ATPC), दुलाराय टिवा आज्यो आफाद(ATWS), मिरिगाव जिल्ला ट्रायबेल संग(MDTS), टिवा साहित्य सभा(TSS), आरो औटनमाच डिमान्द खमिटिफोरा सरबान्दा सनवाल दैदेन्नाय सरकारा नोगोरमायाव थानाय ट्रायबेल बेल्ट आरो ब्लकखौ State Capital Region Development Authority (SCRDA) नि जोहै गेदेर गेदेर फालांगिरिफोरनो हाखौ हगारनो नागिरदों होन्ना गोख्रोंयै अजद दैखांदों।

प्रेस मिटनि गेजेरजों गोजौआव मखनाय आफादफोरनि दैदेनगिरिफोरा बुङोदि, SCRDA नि गुबै थांखिआ जाबाय खोला खामरुपाव थानाय ट्रायबेल बेल्ट आरो ब्लकजों लोगोसे मरिगांव जिल्लायाव थानाय मोन 7 ट्रायबेल बेल्ट आरो ब्लकखौ बोखारनाय, State Capital Region Development Authority Act आ गासै टिवा औटनमास खाउनसिलनि सिङाव थानाय मोन 268 गामिफोर आरो मोन 3 रिभेनिउ चार्कलफोरखौबो लाफादों जायनि जोहै टिवा ओटनमास खाउनसिलखौ गोहो गोयै खालामगोन होन्ना बिथांमोनहा बुङो।