Begin typing your search above and press return to search.

नोगोरारि सोदांनाय बिल 2016 आ थागिबि सुबुंफोरखौ 2थि थाखोनि सुबुं खालामगोन: सा-सान्जा फरायसा आफाद

नोगोरारि सोदांनाय बिल 2016 आ थागिबि सुबुंफोरखौ 2थि थाखोनि सुबुं खालामगोन: सा-सान्जा फरायसा आफाद

Sentinel Digital DeskBy : Sentinel Digital Desk

  |  12 Jan 2019 9:34 AM GMT

गुवाहाटी,जानुवारि 12: थांनाय 8 जानुवारिआव ट्रीपुरा हादोरसानि राजथांवनि आगरटलायाव सा-सान्जा फरायसा आफाद आरो दुलाराय आसाम फरायसा आफादनि 11 घन्टा सा-सान्जा ओनसोल बन्द’ फोसावनायाव पुलिसनि गुलि गावग्लुंनाय जाथायाव जखम जानांनाय आरो जाथायखौ नायजिरनो थाखाय गुवाहाटी गोजौ बिजिरसालिखौ खावलायो। बिथांमोनहा बुङोदि, नोगोरारि सोदांनाय बिल 2016 आ हादोरसानि थागिबि सुबुंफोरखौ हादोरसायाव 2थि थाखोनि सुबुं एबा Second Class नोगोरारि खालामगोन।

खौरां मोन्नाय बादिब्ला सा-सान्जा फरायसा आफाद आरो दुलाराय आसाम फरायसा आफादआ ट्रीपुरा हादोरसा पुलिसनि अयथासार आरो ट्रीपुरा सरकारनि आखुथायफोरखौ नोजोर होनानै दिनै (सनिबार) गोसोम सान (Black Day) फालिगोन होन्ना मिथिनो मोन्नाय जायो।

मखनो गोनांदि, सा-सान्जा फरायसा आफाद आरो आसाम फरायसा आफादनि दोलोआ ट्रीपुरा हादोरसायाव पुलिसनि गुलि गावनायाव जखम जानांनाय सुबुंफोरखौ नायनो थांनायखौ ट्रीपुरा सरकारा होबथानानै आसाम फारसे गिदिंबोफिन्नो गोनां जादों आरो ट्रीपुरा सरकारा फरायसा आफादखौ लाजि फोनांदों।

NESO आरो AASU फरायसा आफादनि बोसोनगिरि ड: सामुज्जल बाधाचार्य बिथांआ गुवाहाटी नोगोरमायाव खौरांगिरिफोरनि सिगांआव बुङोदि, “दानि ट्रीपुरा हादोरसानि खुंथायाव थानाय सरकारआ ट्रीपुरी हीदोरसानि थागिबि सुबुंफोरखौ मानसि नङैबादि आखुथाय दिन्थिदों आरो बेनि फोरमाना 8 जानुवारिआव धर्ना होगिरि बिथांमोनि सायाव हादोरसा पुलिसखौ गुलि गावग्लुंनो खाबु होनायानो”।

मखनो गोनांदि, जेंना गोनां नोगोरारि सोदांनाय बिल 2016 खौ सा-सान्जा ओनसोलाव थानाय थागिबि सुबुंफोरनि माहारियारि आफादफोरा गोबाव समनिफ्रायनो बेरेखा खालामबोगासिनो दं, थांनाय 8 जानुवारिखालि पुलिसनि गुलि गावग्लुंनायाव गासै 18 सुबुंफोरा गुलि नांनानै जखम जादोंमोन बेनिनो सा 5 सुबुंआ गोब्राब जखम जादों होन्ना मिथिनो मोन्नाय जायो।

ट्रीपुरा हादोरसा सरकारआदि थागिबि सुबुंफोरनि बेरेका आरो सुक्रबाराव जखम जानाय सुबुंफोरखौ नायनो थाखाय थांनाय सा-सान्जा फरायसा आफादनि दोलोफोरखौबो हाबहोआखै, बिथांमोनि बेफोर नासयनाय आखुंथायआ सिमा बारबाय। बेफोरबादि ट्रीपुरा सरकारनि आखुथायखौ जों माब्लाबाबो सहायनानै थाया आरो थागिबि सुबुंफोरखौ 2थि थाखोनि सुबुं सान्नानै लानायनिफ्राय जानगाराव थानांगौ” होन्ना बाटाचार्य बिथांआ बुङो।

जुदि नोगोरारि सोदांनाय बिल 2016 खौ थिसननगोन अब्ला गुबुन गुबुन सा-सान्जा ओनसोलाव थानाय हादोरसाफोर, गुबैयै आसाम हादोरसायाबो ट्रीपुरा हादोरसाबादि जागोन, जेराव थागिबि सुबुंफोरा 2थि थाखोनि सुबुंफोरबादि मान मोनो” होन्नानै बाटाछार्य बिथांआ बुंबावो।

सा-सान्जा फरायसा आफादनि गाहाय आफादगिरि सामुयेल जेवरा आरो नेहाथारि सिनाम प्रकास सिंह बिथांमोनहा बुङोदि, “नोगोरारि बिलनि बेरेखायै धर्ना होगिरिफोरखौ गुलि गावग्लुंनाय पुलिस आरो सेकुरिटी हान्जाफोरा एरैबादि अहंकार, जाय बिथांमोनहा जखम जानांनाय सुबुंफोरखौ एम्बुलेन्सजों देहा फाहामसालिसिम लांनाय सुबुंफोरखौबो गाग्लोबदों”।

Next Story
गाहाय रादाब