गुवाहाटी,अक्टबर 13: खुंथायाव थानाय भारतीय’ जनता दोलोनि लोगो आसाम गन’ परिसदआ सुक्रबाराव बुङोदि, मिरु सरकारनि मावथांखि बादियै नोगोरारि सोदांनाय बिल 2016 खौ जायखिजाया जाहोनावनो आरो माब्लाबाबो गनायनानै लानो हाया आरो जाहोआ होन्नानै बुङो।
बे बाथ्राखौ ब्रिहस्पथिबाराव बिजेपि दोलोआ सान्नैनि हाबाफारि लानानै Executive नि मेल खुंनायाव जेब्ला बिजेपि दोलोआ एन.आर.ची सोदांनाय, नोगोरारि सोदांनाय बिल 2016, आसाम गोरोबथा एबा आसाम एकर्डफोरखौ सावरायनायजों लोगोसे थागिबि सुबुंफोरनि सिनायथि गोमालांनो नागिरनायनि सायाव सावरायो अब्ला एजिपि दोलोनि गाहाय नेहाथारि कमला कान्ट कलिथा बिथांआ बुङोदि, एजिपि दोलोआ माब्लाबावो गनायनानै लाया, जाय मावथांखिआ असमिया आरो थागिबि सुबुंफोरनि सान्नाय, लुबैनाय, हास्थाय लोगोसे सिनायथि आरो हारिमुखौ खोमागोन।
बिथांआ बुंबावोदि, एजिपि दोलोआ मावख’निफ्राय आरो राजखान्थिजों मिथिहोखानाय जाबायदि नोगोरारि सोदांनाय बिल 2016 खौ माब्लाबाबो गनायनानै लाया।
मख’नो गोनांदि, बावैसो दाननि सिगां केबिनेटनि मनट्री आरो एजिपि दोलोनि आफादगिरि अटुल बरा बिथांआ गुवाहाटी नोगोरमायाव अमिट साहाजों जानाय North-East Democratic Alliance नि मेलाव बुंखादोंमोनदि एजिपि दोलोआ नोगोरारि सोदांनाय बिल 2016 खौ गनायनानै लाया।