गोदान दिल्ली: भारत हादोरजों बायफ्लेनाय सोमोन्दोखौ मोजां खालामनो थाखाय उदांस्रि सानखौ नोजोर होनानै दिनै पाकिस्टान सरकरा सा 30 भारतारिफोरखौ 14 आगस्तआव उदांस्रि सान फालिनायनि सिगां जोबथेसालिनिफ्राय उदां खालामबाय।
पाकिस्ताननि फरेन अफिसनि बुंथिगिरि महामद फायसालआदिनै खौरांगिरिफोरनि सिगांआव बुङोदि, “14 आगस्तआव उदांस्रि सानखौ फालिनो थाखाय सुबुं माहारि सान्नानै उदां खालामनाय जाबाय”।
खौरां मोन्नाय बादिब्ला गासै सा 30 नि गेजेराव सा 27 आ लैथोआव ना हमगिरिफोर जाय बिथांमोनहा मिथिस्लाबैआव भारत लैथोनि सिमा बारनानै पाकिस्ताननि जोबथेसालिआव दोनजादोंमोन।
मिथिनो गोनांदि, भारत सरकारनि मावख’निफ्राय खौरां मोन्नाय बादिब्ला गासै सा 470 निबो बांसिन भारतारिफोरा पकिस्ताननि गुबुन गुबुन जायगानि जोबथेसालिआव दं, बेनिनो सा 418 सुबुंफोरा ना हमग्रा होन्ना मिथिनो मोनो।
पाकिस्ताननिफ्राय खौरां मोन्नाय बादिब्ला ना हमग्राफोरा पाकिस्ताननि बिबानगिरिजों दैनि हेफाजाबाव आयेन बेरेखायै सिमा बारलांनानै ना हमनायनि जाहोनाव खाजादों।