इस्लामाबाद,मार्च 01: निउक्लियार गोहो थानाय पाकिस्तान आरो भारत मोन्नै हादोरनि गेजेराव अखां दावहा सोलिफुगासिनो थानाय समाव पाकिस्तान हादोरनि गाहाय मंत्री इमरान कान बिथांआ भारतजों सावरायनो होन्ना खेबसे खाबु होबावो आरो बिथांआ बुङोदि, Better sense should prevail” एबा बे खेबआव भारतआ गोदानै सानफिननांगौ।
जेब्ला Pakistan Air Force (PAF) आरो Indian Air Force (IAF) नि गेजेराव अख्रां दावहा सोलिफुगासिनो थानाय समाव गोदान दिल्लीनिफ्राय पाकिस्तान हादोरनि IAF जेत बिरखंखौ गावख्लायदों होन्ना बुंदोंमोन अब्ला कान बिथांआ बे बाथ्राखौ बुङो। फारसेथिं भारत हादोरनि IAF नि MiG-21 बिरखं जाहाजआ पाकिस्तान हादोरनि सिमायाव गोमानानै दंहोयोमोन आरो IAF बिरखंनि खामान्डार बिथांआ पाकिस्तान पुलिसनि आखायाव हमजानो गोनां जाहैदोंमोन।
फार्सेथिं पाकिस्तान हादोरा सिगां मिथिहोदोंमोनदि बिथांमोनहा भारतनि मोन 2 बिरखं जाहाजखौ पाकिस्तान हादोर आव गावख्लायनो मोनदों आरो सानै पाइलटफोरखौ हमनो मोन्दों। उनाव पाकिस्तान हादोरनि मिलिटारि बिफानआ सासेल’ पाइलटखौ हमनानै मोजाङै मिथिहोफिनो।
पाकिस्तान हादोराव हमजानाय पाइलटखौ IAF बिरखं जाहाजनि खामान्डार अभिनन्दन भार्टामान होन्ना सिनायथि मोन्नाय जायो। हमजानाय बिथांनि भिडिअ’खौबो पाकिस्तान हादोरनि सुबुं सावस्रिफोराव भाइराल खालामनानै होयो। भिडिअ’नि गेजेरजों अभिनन्दन बिथांखौ मोखांआव जि काथेनानै जखम जानाय नुनो मोन्नाय जादोंमोन।
पाकिस्तान हादोरनि गाहाय मंत्री इमरान कान बिथांआ पाकिस्तान तेलिभिसननि गेजेरजों बुंदोंदि, “नोंथांआ जोंनि हादोराव हाबफैयोब्ला जों बेखौ मावगोन... बेनिफ्राय बिथांमोनि गं 2 MiG बिरखंखौ गावख्लायनो हादों... जों जोंनि मेलेमखौ बाहायो आरो गोसो जानानै खामानिखौ मावो..।
“गासैबो दावहायानो गोरोन्थि बुजिलाइनाय, आरो बबेसिम सहैगोन रावबो बुंसनो हाया। सेथि मुलुग दावहाया से सप्थायावनो जोबनानै थांनांगौमोन, नाथाय 6 बोसोर आवसो जोबहैदों। बेबादिनो उदखारिफोरनि हेंथा दावहाया 17 बोसोर थांनो नाङामोन”।
“आं भारत हादोरखौ खावलायोदि: नोंथांमोनाव जेसेबां हाथियार दं, जोंनावबो एसेबां हाथियार दं, जों थारैनो गोरोन्थियै हिसाब खालामदोंनामा? जुदि बेबादियैनो थांबाय थायोब्ला हादोरखौ आं कन्ट्रल खालामनो हानाय नङा आरो गाहाय मंत्री नारेन्ड्र मोडीआबो कन्ट्रल कालामनो हानाय नङा” होन्ना बिथांआ बुंबावो।
थांनाय 14 फेब्रुवारि 2019 अक्ट’आव जेब्ला जम्मु आरो काश्मीर हादोरसानि पुलवामा जिल्लायाव बमा बेरनाय जाथायजों सा 40 निबो बांसिन सीआरपीएफ रौनिया हान्जानि सोद्रोमाफोरा मुंख्लं जालांदोंमोन अब्ला पाकिस्तान हादोराव जोनोम मोन्नाय जाइस-इ-महामद इस्लामिक उदखारि हान्जानि सोद्रोमाफोरा जाथायजों लोब्बा दं होन्ना सिमान जानाय लोगो लोगोनो भारत आरो पाकिस्ताननि गेजेराव दाङाबाजिआ बांलांनो हमो।
थांनाय मंगलबारनि फुंब्लिआव भारतनि IAF बिरखं जाहाजजों पाकिस्तान हादोरनि बालाकत ओनसोलाव थानाय उदखारि हान्जाफोरनि गेदेरथार बादा आरो अदखारि सोलोंथाय मिरु आव गासै 1000 किलग्राम लेरथायनि बमा गारहैनानै सिलिंखार खालामनानै गासै सा 200 निफ्राय 300 सो उदखारिफोरखौ फोजोबनो हादों होन्ना खौरां बिजोंनि गेजेरजों मिथिनो मोन्नाय जादों।
फारसेथिं पाकिस्तान हादोरनि गाहाय मंत्री इमरान कान बिथांआ पुलवामा गाग्लोबनाय जाथायखौ बिजिरगोन होन्ना खोथा होदोंमोन।
“पुलवामा जाथाय जानायाव नोंथांमोन् दुखुखौ जों बुजिदों, जाथायखौ बिजिरनो आरो सावरायनो जों राजि, फै जयै जिरायनानै सावरायनानै जेंनाखौ फोजोबनो” होन्ना इमरान कान बिथांआ बुङो।
“... गोबां बोसोरनिफ्रायनो दावहानि थाखाय जों फुगिनांनानै दं, दावहानि ओंथिआ मा... जों बेखौ मिथिगौ, जागायजेन्नायनिफ्रायनो जों भारतखौ जाथायजों लोब्बा थानाय फोरमान होनो खावलायगासिनो दं, पाकिस्तान हादोरा आथिखालआव उदखारिफोरनि जायगा नङा” होन्ना इमरान कान बिथांआ बुंबावो।
पाकिस्तान आर्मि बिफाननि Inter-Services Public Relations (ISPR) नि नेहाथारि आरो बोसोनगिरि, मेजर जॉनरल आसिफ घाफुर बिथांआ रादाब बिबुंसारनि गेजेरजों बुंदोंदि, “पाकिस्तान हादोरा गोजोन लुबैयो आरो भारत हादोरा बुजिनांगौदि, दावहाया मावफारिया लानायनि मोनसे फेलें”।
“जों गोजोन लाबोनाय लामाखौ सिफायनो साना, मोन्नैबो हादोरनि सुबुंफोरा थांनानै थानायनि मोन्थाय दं, गोजोनै थानायनि मोन्थाय दं, दावहाया जेंनाखौ सुस्रांनानै होआ, भारत हादोरा गुसु मेलेमजों साननांगौदि पाकिस्तान हादोरा सावरायनो थाखाय खावलायहरगासिनो दं” होन्ना बिथांआ बुंबावो।
फारसेथिं दुखुनांथाव बाथ्राया बेसोदि, पाकिस्तान हादोरा उदखारि हान्जाखौ दोनखोमानानै भारत हादोरनिफ्राय पुलवामा गाग्लोबनाय जाथायनि फोरमान बिहरोब्ला बबेनिफ्राय फोरमान होगोन। पाकिस्तान हादोरा उदखारि हान्जाखौ दोनखोमानानै दोनदोंब्लाबो जाइस-इ-महामद उदकारि हान्जाया गावसोरनो जाथायजों लोब्बा दं होन्ना सिमान जासेआवबो आरो पाकिस्तान हादोरनो माबादि फोरमान नांबावगौ? गुबै सोंथिआ बेसो।
