प्रनय कुमार मुछाहारिआ मेघालया हादोरसानि लकायुक्ता बिफान्नि गाहाय मासिआव जिरायबाय
सिलं,नबेम्बर 7: गोबाव सम नेनायनि उनाव, मेघालया हादोरसाया लकायुक्ता (रां जाख्ल’नाय बेरेखा बिफान) बिफान्नि गाहाय सुबुंखौ मोनबाय। मंगलबाराव, मेघालया हादोरसानि गिबिसिन लकायुक्ता बिफान्नि गाहाय मासिनि बिबानाव जिरायनो थाखाय हादोरसा खुंगिरि थाटागाथा रय बिथांआ राज भबनाव गुवाहाटी गोजौ बिजिरसालिनि बार्ग बिजिरगिरि प्रनय कुमार मुछाहारि बिथांखौ समायखिरा लाहोयो।
मखनो गोनांदि, मेघालया हादोरसायाव लकायुक्ता बिल 2014 खौ हादोरसानि बिधान सबायाव 2014 माइथायनि 7 मार्च दानाव खुंथायाव थानाय कंग्रेस सरकारनि मेघालया इउनायटेड एलाइन्च (MUA) राजखान्थि दोलोआ सोदांदोंमोन।
समायखिरा लाखांनानै मुछाहारि बिथांआ खौरांगिरिफोरनि सिगांआव बुङोदि- “फै बयबो सिगांबो, रां जाख्लनाय सुबुंफोरनि बेरेखायै खमप्लेन होनि”।
“सुबुंनि रां जाखुमानाय आरो जाख्ल’नाय सुबुंफोरनि बेरेखायै लकायुक्ता बिफानाव कमप्लेन होनो थाखाय आं साफ्रोमबो सुबुंफोरखौ खावलायो आरो हेफाज होगोन होन्ना मिजिं थिबाय” होन्नानै गुवाहाटी गोजौ बिजिरसालिनि बार्ग बिजिरगिरि मुछाहारिआ बुंबावो।
बिथांआ मेघालया हादोरसानि लकायुक्ता बिफानाव खालि जानानै थानाय गुबुन साब्रैनि मासिखौबो थाबैनो सुफुंनो थाखाय मेघालया लकायुक्ता बिफान्नि गाहाय जानानै बिथां मुछाहारिआ खावलायो।
मुछाहारिआ बुंबावोदि- आं सरकारखौ खावलायोदि, खामानिफोरखौ मावफुंलांनो थाखाय थाबैनो लखायुक्ता बिफान्नि गाहाय नेहाथारि आरो गुबुन गुबुन बिबानाव माखासे फुलिस अफिसारफोरखौ थाबैनो थिसनो जाहाथे खमप्लेनफोरनि सायाव नायबिजिरनाया गोरलै जानानै फैयो।
प्रनय कुमार मुछाहारि बिथांनि समायकिरा लानाय समाव हादोरसा दावबाय बिफान्नि मनट्री मिटबाह लाइगदन, सोलोंथाय बिफान्नि मनट्री लांकमेन रायमबुय आरो मेघालया बिधान सभानि बेरेखा हान्जानि दैदेनगिरि ड: मुकुल सांगमा लोगोसे पुलिस अफिसारफोर।
नाथाय गिबि मनट्री खनराद के सांगमा, नखर मनट्री जेम्स के सांमा, आरो बिधान सभानि बुंथिगिरि ड: दनकुपार रय बिथांमोनहा समायकिरा लानाय समाव नुजाथिआखौ होन्ना खौरां मोन्नाय जायो।
मखनो गोनांदि- हादोरनि जौसिन बिजिरसानि बिथोन बादियै लकायुक्ता बिफानाव हादोरसानि सायख’ आफादआ मुछाहारि बिथांनि मुंखौ थांनाय जुलाइ दानाव सायख’दोंमोन।
