बार्ग अरन बिफान्नि मनट्री रकिबुल हुस्सेन बिथांआ बादारुद्दीन आजमलखौ जुनारसो होन्ना बुङो

नगांव,डिसेम्बर 27: बार्ग अरन बिफान्नि मंत्री आरो कंग्रेस दोलोनि दैदेनगिरि रकिबुल हुस्सेन बिथांआ मानकाछार जिल्लानि हाटसिंगिमारिआव थांनाय 26 अक्टखालि बादारुद्दीन आजमल बिथांनि आखुतायखौ नोजोर होनानै बादारुद्दीन आजमल, जाय बिथांआ AIUDF दोलोखौ दैदेनबोगासिनो दं, बे बिथांखौ मासे सुनारजों रुजुनानै बाकलेवा एबा मोसा होन्नानै सोंखारिदों, जाय जुनारा गावनि जायगानिफ्राय सोलायलांनो हाया।

“हाग्रानि जुनार बाखलेवाया जेरै गावनि जायगाखौ सोलायलांनो हाया, आजमल बिथांआबो गावनि महरखौ सोलाइनो हाया, बे बाथ्राखौ बावैसो जानाय खौरांगरिनि मोगा मोगिआव फोराय जाबाय, बेफोरबादि दैदेनगिरिआ देमक्रेटिक हादोराव गांवनि रांनि गोहोजोंसो दैदेनगिरि जानानै दं” होन्ना हुस्सेन बिथांआ बुङो।

बिथांनि आखुथायखौ आरो टुयेटारनि गेजेरजों बाथ्रा बुंनायखौ नोजोर होनानै हुस्सेन बिथांआ बुंङोदि, “बेफोरबादि मानसिआ गनायजाथावै राव बुंनायनि थाखायसो मुंदांखा जानाय”।

बिथांनि भारतीय’ जनता पार्टीजों बुजिलायनायखौ नोजोर होनानै बिथांआ बुङोदि, आजमल बिथांआ आखायाव ग्लब गान्नानै भारतीय’ जनता पार्टीजों बुजिलायदों, जाय बिथांमोनि खामानि मावनाया मोखथांआव मोजां फिथाय थाया। बिथांआ सासे खुंथायाव थानाय सरकारनि एजेन्त होन्नानै बिथांआ बुंबावो।

“भारतिय’ जनता पार्टी एबा बिजेपि राजखान्थि दोलोनि गुबै थांखिआनो जाबाय आनमल बिथांखौ जोथोन लानाय आरो रैखाथि होनाय। हादोरसायाव बिजेपि सरकारा खुंथायाव 2 बोसोर खावसे सम बारलांदोंब्लाबो जेबो जौगाखां खामानि मावाखै, नाथाय बाथ्राफोरखौल’ गोजौ गोजौ बुंगासिनो दं, बिजेपि दोलोआ 2014 आरो 2016 माइथायनि बिसायखथिआव खोथा होनाय बादि नै लाख साख्रि गोयै सुबुंफोरखौ साख्रिआव थिसनगोन होन्ना खोथाया फेलें जादों” होन्ना रकिबुल हुस्सेन बिथांआ बुङो।

बिजेपि सरकारा हादोरसानि फोरोंगिरिफोरखौबो सरकारि खालामनानै होनो हायाखै जायनि जाहोनाव बिथांमोनहा बावैसो सिगां धर्ना होनो गोनां जादोंमोन होन्नानैबो हुस्सेन बिथांआ बुबावो।

फारसेथिं, आबादारिफोरनि दैदेनगिरि अकिल गगय बिथांआ दिनै बुङोदि, AIUDF नि दैदेनगिरि आरो धुबुरि जिल्लानि MP बादारुद्दीन आजमल बिथांखौ थाबैनो पुलिसआ खानांगौ मानोना बिथांआ खौरांगिरिखौ बुथारनो होन्नानै हुमखि होदों।

आजमल बिथांनि बेफोरबादि आखुथाया IPC नि आयेन बादियै 307 खोन्दोआव गोग्लैयो। बिथांआ खौरांगिरिनि माइकखौ सेखनानै खर’ बुखावनायनि बाथ्रा बुंदों आरो खाथिआव थानाय आजमल बिथांनि हेफाजाब होगिरिफोराबो खौरांगिरिखौ निमाहा बिनो खावलायदों।

गगय बिथांआ बुबावोदि, खौरांगिरिखौ बुथारनायनि बाथ्रा बुंदों, बिथांखौ जायखिजाया समावनो गाग्लोबनो हागौ बेनिखायनो खौरांगिरिनो सेकुरिटी होनांगौ आरो AIUDF नि दैदेनगिरि आजमल बिथांखौ IPC नि 307 दफानि आयेन बादियै थाबैनो खानांगौ होन्ना दाबि दैखांबावो।