बिटिची खुंथायनि Tourism बिफानआ paramotor आरो paragliding नि ट्रेनिं होनाय खामानिआव मुखुब

क’कराझार,डिसेम्बर 1: क’कराझार जिल्लानि सिङाव थानाय मुंदांका चक्रचिला अवाइल्डलाईफ शांगसुरिनि दिर बिल आव दावबायारिफोरनि गोसोखौ बोनो थाखाय 10 सान्नि हाबाफारि लानानै बिटिची खुंथायनि दावबाइ (Tourism) बिफानआ Adventurer’s Abode जों लोगो नांनानै ब्रिहस्पथिबारनिफ्राय paramotor आरो paragliding नि सायाव ट्रेनिं होनाय हाबाफारिखौ जागायबाय।

बिटिची दावबाइ बिफान्नि डायरेक्टर महन चन्ड्र ब्रम्ह बिथांआ खौरांगिरिफोरनि सिगांआव बुङोदि, ब्रै बोसोर सिगां सा-सान्जा ओनसोलफोरनि गेजेराव बड’लैन्ड टुरिजम बिफानआनो गिबिसिन paragliding खौ फोसावनानै होदोंमोन आरो गोरों गोरों सुबुंफोरा क’कराझारनि चक्रचिलायाव थानाय दांगदुवार हाजोआव बिरगासिनो दं। बेजों लोगोसे बिटिची खुंथायनि दावबाइ बिफानआ गोहोजों बिरग्रा paragliding or paramotor खौबो फोसावबाय बेफोरनिनो ट्रेनिं होनाय बादियै चक्रचिला अवाइल्डलाईफ शांगसुरिनि दिर बिल आव 10 साननि हाबाफारि लानानै फोरोंथाय होगासिनो दं।

बिथांआ बुंबावोदि, फोरोंथाय होनाय हाबाफारिआ दिर बिलआव सोलिगासिनो दं। बे हाबाफारिआव दिल्लीनिफ्राय फैनाय सानै फोरोंगिरिआ बिटिचीनि सा 3 लाइमोनफोरखौ ट्रेनिंग होगासिनो दं, बेनि उनाव सोलोंथाय मोन्नाय लाइमोनफोरखौ बे बिफानावनो नांथाबनो खाबु होगोन आरो बिटिची खुंथाया गंनै एबा गं थामसो गोहोजों बिरग्रा paramotor खौ बायबावगोन होन्ना बिथांआ बुंबावो।