बिस गोनां जिबौ अरनायाव सासे हिन्जावसानि जिउ खहा

पातसाला: समबाराव बरपेटा जिल्लानि सिङाव थानाय सरुपेटा ओनसोलनि खलेज फरायफुनाय सासे 22 बोसोरनि हिन्जावसाया गावनि न’आवनो बिस गोनां जिबौ अरनायनि जाहोनाव जिउ गोमानो गोनां जायो। जिउ गोमानाय सुबुंखौ सरुपेटा ओनसोलाव थानाय राबिनद्र बर’ आरो नागेस्वरि बर’नि फिसाजो नबनिता बर’ होन्ना सिनायथि मोनो। नबनिथा बर’आ बजालि गोजौ फरायसालिमायाव असमिया आयदाखौ लानानै MA थामथि सेमिस्ताराव फरायफुगासिनो दंमोन।

खौरां मोन्नाय बादिब्ला, जेब्ला नबनिताया ओंखाम संग्रा न’मा न’आव खामानि मावगासिनो दंमोन अब्ला बिस गोनां कब्रा मुंनि जिबौआ नबनितानि आयथिंआ अरनानै होयो। नखरनि सुबुंफोरा हाखु दाखु बरपेटा जिल्लानि फकुरुदिन आलि आहामेद देहा फाहामसालियाव थिसनदोंमोनब्लाबो जाथाया गोब्राब जानायलाय डक्टरआ बंगाइगावनि लवार आसाम देहा फाहामसालियाव दैथाय हरदोंमोन। बिथांखौ ICU आव दोंनदोंमोन नाथाय देहा फाहामगिरिआ 8 अक्तआव जोबथा हां बोबाय होन्ना नखरनि सुबुंफोरनो मिथिहोयो।