गुवाहाटी,डिसेम्बर 19: जुदि बोथोरखौ गुसु मोनदोंब्ला, गुसुनिफ्राय गुसुआव थांसिनबावगोन। समबारनि मोनायाव बेय अव बेंगल लैथोमायाव ‘पेटाइ’ मुंनि बारहुंखा आरो अखा हानाया मंगलबारनिफ्राय आसाम हादोरसायाव अखा आरो गुसु बार लानानै फैदों, जायनि थाखाय जोंखौ बे बोसोराव गुसु बोथोरा एसे असु खुथु मोनहोदों।
मंगलबाराव बोथोर नायसंगिरिफोरा मिथिहोनाय बादिब्ला अखा हानाय सानथामसो सोलिबाय थागोन आरो बोथोरनि बिदुंआ खमायलांबाय थागोन। माखासे गुवाहाटी नोगोरमानि थागिरि सुबुंफोरा बेफोरखौ नोजोर होआखैमोन आरो गुसु बोथोरखौ मोनदांआखैमोन नाथाय जेब्ला हरखाबै अखा आरो गुसु बार बारनो बमो अब्लानिफ्राय गुवाहाटी नोगोरमायाव थागिरि सुबुंफोरजों लोगोसे आसाम हादोरसानि खना खनला थानाय सुबुंफोरनि देहायावबो गुसु बोथोरा नांनो हमबाय।
“मंगलबारखालि गुवाहाटी नोगोरमानि बिदुंआ खमथाराव 16 दिग्रि चेलसीयास दंमोन आरो बाराथाराव 19.01 दिग्रि चेलसीयास दंमोन। आसामनि गेजेरजों मारकिउरिनि बिदुंआबो गोबारैनो खमायबोनो हमदों। बोथोर बिजिरगिरिफोरा मिथिहोनाय बादिब्ला हादोरसानि गोबां जायगाफोराव सान 3 सो अखा हाबाय थागोन आरो अख्रांआव जोमै थागोन” बे बाथ्राखौ गुवाहाटी नोगोरमानि साखाथिआव थानाय बरजारनि Regional Meteorological Center नि मावख’निफ्राय सेंन्टिनेलनि खौरांगिरिनि सिगांआव फोरमायो।
नोगोरमानि सुबुंफोरा गुसु मोनदों। “आं फैगौ सान्नैसोनि फुंआव थाबायग्लांनाय (morning walk) हुदाखौ दोनथ’नोसै मानोना बोथोरा गुसुनिफ्राय गुसु जालांगासिनो दं”, पान बाजारनि थागिरि संगिता सायकिया बिथांआ बुङो। जाय बिथांआ सानफ्रोमबो दिगलिपुकुरिनि पार्कआव फुंआव थाबायग्लाङो।
मंगलबाराव हरखाबै बोथोरनि बिदुंआ 16 दिग्रिआव फैनायलाय गुवाहाटी नोगोरमानि खना खनला माखासे सुबुंफोरा लामा सेर सेर अर सावनानै गावनि मोदोमखौ गुदुं खालामनायबो नुनो मोन्नाय जादों।
धुबुरि जिल्लायाव थानाय फरायसालिमानि फोरोंगिरि आमजाद आलि बिथांआ बुङोदि, “आंनि जिल्लायाव बोथोराथ’ गुसुमोन नाथाय मंगलबाराव अखा आरो बार बारनायनि जाहोनाव हरखाबै गुसुनिफ्राय गुसुसिन जाबोदों”।
क’कराझार जिल्लानि हाब्रुबारि गामिनि थागिरि दैमु ब्रम्ह बिथांआबो जिल्लायाव मंगलबारनिफ्राय गुसु जाबोदों होन्ना जोंनिसिम खौरांआव फोरमायहरो।