ब्रिटिसनि समाव सोदांनाय हा आयेनखौ नायबिजिरनो मावथांखि लाबाय
गुवाहाटी,आगस्त 30: आसाम सरकारा ब्रिटिसनि समनिफ्रायनो सोलिबोबाय थानाय हा आयेनखौ नायबिजिरनानै गोदान हा आयेन सोदांनो थाखाय मावथांखि लागासिनो दं। बे खामानिखौ दानि सोलिफुबाय थानाय गोदान ‘हा आयेन 2018’ सोदांनायनि खामानिफोरखौ लाफानानै खनसेयैनो मावलांगोन लोगोसे आयेननि गेजेरजों आसामनि थागिबि सुबुंफोरनि मोन्थायखौ रैखाथि होनानै गुबुन गुबुन हानि जेंनाफोरखौ नायबिजिरगोन होन्ना मिथिनो मोनो।
दानि खुंथायाव थानाय रिभेनिउ आरो डिसेस्तार मेनेजमेन बिफाना ‘आसाम हा आरो रिभेनिउ रिगुलेसन एक्त 1886’ खौ नायबिजिरनानै मोन्दांथिखौ आसामनि गिबि मनट्री सरबानन्द सनवालनो गथायगोन। आयेन सोदांनायाव माखासे थाखानाय आयेन आरो हानि खमिटिफोरनि हेफाजाब लागोन होन्ना खौरां मोनो।
बावैसो आसामनि थागिबि सुबुंफोरनि हाखौ रैखाथि होनो थाखाय खमिटि दाजानाय ‘हरिसंकर ब्रम्ह खमिटि’ आरो बिथांमोनिफ्राय मोन्नाय हानि फोरमान बिलाइ एबा गोदान आयेनफोरखौ गनायनानै लागोन होन्नाबो खौरां मोन्नाय जायो।
बिथांमोनहा फोरमान बिलाइनि गेजेरजों फोरमाइदोंदि, 1964 माइथायनिफ्रायनो थाबोनाय आरो हा सारभे खालामनाया 53 बोसोर जालांदोंब्लाबो दासिमबो आसामनि थागिबि रोजा रोजा सुबुंफोरा हानि पाट्टा एबा फोरमान बिलाइ मोनाखै जायनि जाहोनाव थागिबि सुबुंफोरा आसामनि रैखाथि खाबुफोरखौ मोनाखै।
ब्रम्ह खमिटिआ मिथिनो लुबैदोंदि, एन.आर.चीखौ नोजोर होनानै आसामनि बेसेबां गुवार हाखौ सनदेह गोनां सुबुं एबा ‘D’ Voter फोरा आवग्रिनानै दं। ब्रम्ह बिथांमोनहा गुबैयै ट्रायबेल बेल्ट आरो सरकारि हाफोरखौ सेटालाइट सान्थोवजों फारसेनिफ्राय मिथिनो लुबैदों।
रिपर्टनि गेजेरजों बिथांमोनहा मिथिहोदोंदि, गोबां गुबुनारि एबा बांग्लादेसिफोरा हाजो ओनसोल, दैब’ ओनसोल, रिजार्प हाग्रा ओनसोल, रिजार्प लामा सेरनि हा, चाट्रा, ट्रायबेल बेल्ट, आरो गुबुन गुबुन हानि ब्लकफोराव बिथांमोनहा सिमा बारनानै थाजोब्बाय।
ब्रम्ह खमिटिआ मिथिनो लुबैबावदोंदि, हादोरसायाव बेसेबां थागिबि सुबुंफोरा हा गैजाया। गिबि खेबनि नायबिजिरनायाव मोन्नाय जादोंदि, थागिबि सुबुंनि एभारेज हा गोनांआ से बिघा आरो खमसिन। खमिटिआ जोबथा रिपर्टखौ जमा होनायनि सिगां सनदेह’ गोनां सुबुंफोरनि हाफोरखौ बोखारनो एबा Eviction Drives खालामनो सरकारखौ बिथोन होदों।
