भारत आव खोला आरबनि क्राउन प्रिन्च महामह बिन सलमान
गोदान दिल्ली,फेब्रुवारि 20: खोला आरबनि क्राउन प्रिन्च महामद बिन सलमान बिथांआ भारत हादोराव मंगलबारखालि गिबि खेबनि थाखाय आगान होफैयो। बिथांखौ हादोरनि गाहाय मंत्री नारेन्ड्र मोडी बिथांआ बिरखं बाग्रायाव आखाय हमना गोबालायनानै दंब्रुदै बरायो। (IANS)
हादोरनि गाहाय मंत्री नारेन्ड्र मोडी बिथांआ खौरां बिजोंनि गेजेरजों बुङोदि, खोला आरब आरो भारतनि गोरोबथा आरो लोगोआ दानि नङा नाथाय गोबांव जालांबाय, खोला आरब हादोरआ भारत हादोरनि थाखाय मोनसे जोबोद गोनां हादर, थाव (Oil) लाबोनाय आरो International Solar Alliance आवबो गोरोबथायाव दं होन्ना बिथांआ बुङो।
जम्मु आरो काश्मीर हादोरसानि पुलवामा जिल्लायाव इस्लामिक उदखारि हान्जानि गाग्लोबनायखौ नोजोर होनानै बिथांआ बुंदोंदि, उदखारि हान्जा आरो उदखारि हान्जाफोरखौ हेफाजाब होग्रा हादोरफोरनि सायाव गोख्रों राहा लानाया गोनांथार।
फारसेथिं भारतनि साखाथिआव थानाय पाकिस्तान हादोरनि गाहाय मंत्री इमरान कान बिथांआ 19 फेब्रुवारि 2019 आव पाकिस्ताननि खौरां बिजोंनि गेजेरजों गोदान दिल्लीसिम मिथिहोहरदोंमोनदि, थांनाय ब्रिहस्पथिबारखालि जम्मु आरो काश्मीर हादोरसानि पुलवामा जिल्लायाव उदखारि हान्जानि गाग्लोबनायजों सा 44 रौनिया हान्जानि सोद्रोमाफोरखौ मुंख्लं खालामनाय जाथायजों लोब्बा गैया, जुदि भारत हादोरनिफ्राय माबाफोर फोरमान दं होन्ना फोरमायनो हायोब्ला पाकिस्तान हादोरा गोख्रों राहा लागोन।
भारत हादोरा पुलवामा गाग्लोबनायखौ लानानै पाकिस्तान हादोरखौ सोंखारिबाय थानायखौ नोजोर होनानै पाकिस्तान हादोरनि गाहाय मंत्री कान बिथांआ भिडिअनि गेजेरजों बुङोदि, पुलवामा गाग्लोबनाय जाथायखौ लानानै भारतनि बाथ्राफोराव फिन्नाय होनायनिफ्राय जानगाराव थानो सानो आरो 18 फेब्रावरि आव खोला आरबनि क्राउन प्रिन्च फैनाय समाव सुबुंफोरनि गोसोखौ सोलाइहोनो सानाखैमोन।
"आं भारतनि थाखाय खाबु होनो लबैयो होन्ना बिथांआ बुंदोंदि, पाकिस्तान हादोरा लोब्बा दं होन्ना गोदान दिल्लीआ फोरमान होनो हायोब्ला इस्लामाबादआ नायबिजिरगोन आरो गोख्रों राहा लागोन" होन्ना बिथांआ बुङो।
पाकिस्तान हादोराबो गोबां खहा जालांगासिनो दं, गासै 70 रोजा सुबुंफोरा मुंख्लं जालांबाय। भारत हादोरा गोदानै सानफिननायनि सम जाबाय, मानि थाखाय काश्मीर आव बोफोरबादि जाथायफोरा जानो मोनगासिनो दं" होन्नानैबो बिथांआ बुङो।
भारत हादोरा पाकिस्तान हादोरखौ दायनिगिरि खालामनानै गाग्लोबोब्ला पाकिस्तान हादोरा फिन्नाय होनो साननानै थानाय नङा, नाथाय गोख्रोङै फिन्नायखौ होगोन, कान बिथांआ बुङो।
