गुवाहाटी,नवेम्बर 23: सा-सान्जा हादोरसानि मोनसे फिसा मिजराम हादोरसायाव फैगौ 28 नवेम्बराव एसेमब्लि बिसायखथिखौ खुंफुंनो साखाफारा। बेनिनो क्रिस्टान धोरोमजों दैखांहरजानाय NGO आबो जेबो जेंना गैया लासे खुंफुंनो आरो बिसायखथिआव बाहागो लानो थाखाय साखाफारा। NGO आनो मोनफ्रोमबो सियाबाव बिसायखथिनि थाखाय रेलि एबा Campaign होनायफोरखौ सैमा सिखारिफोरबादि नायनो थाखाय साखाफारा।
मिजराम हादोरसा बिसायखथिनि थाखाय Campaign होनायाव गुबुन हाजो ओनसोल बिसायखथिफोरबादि नङा (सोलोंथाय बिथिंआव बांसिन जानायलाय 91.58%) बिथांमोनहा बिसायखथि समाव समखौ ओरैनो हगारहरनो नाजायाखै, आद्दा मारिनाय, हाबानि सोमोन्दै रायज्लायनाय आरो ज’जानानै पार्टि जानाय बायदि बायदिफोराव नांथाबनानै थायाखै नाथाय बिसायखथिआव बाहागो लागोन बिजाथिनि सोमोन्दै आरो ओनसोलाव थानाय भट होगिरिफोरनि सोमोन्दै रायज्लायनायखौ बांसिनै नुनो मोन्नाय जादों।
बिसायखथिनि सिगां केमपेन होनायफोरखौ नायनायानो भारत बिसायखथि बिफान्नि थाखाय सोमोनांथाव खामानि जागोन मानोना केमपेननि गेजेरजों बिसायखथिनि आयेन-आब्रुथिफोरखौ सिफायनो नागिरनाय सुबुंफोरा बांसिन।
हाजो हादोरसा मिजरामनि थांनाय 2008 आरो 2013 नि एशेमब्लि बिसायखथिखौ नायोब्ला नुनो मोनगोनदि, क्रिस्टानफोरनि चार्ज आरो NGO फोरनि नायनायाव साफ्रोमबो बिजाथिआनो Campaign नि थाखाय होखानाय माखासे आयेन आब्रुथिफोरखौ मानिनानै सोलिनो नांगोन। बेनिनो मोनसे बिदिन्थि बादियै, साफ्रोमबो बिजाथिआनो गाव गावनि थाकि आरो मानि थाखाय भट होगिरिफोरा बिथांखौ भट होनानै देरहा होनांगौ बेनि सायाव मोनफ्रोमबो Campaign फोरावनो फोसावनानै होनांगौ।
ओरैनो, बिसायखथिनि थाखाय जथुमाफोरा ओनसोलनि सुबुंफोरजों सावरायनो एबा Campaign खालानो थाखाय community hall आव मेल जथुमनाय जायो आरो चार्ज एबा NGO फोरनि सुबुंफोरा भट होगिरि आरो बिजाथिफोरजों सावरायज्लायनायखौ फारसेनिफ्राय नायो। बे हाबाफारिआव बिजाथिफोरा भट होगिरिफोरजों खाथिआवनो थानानै सोंनाय फिन्नायफोरनि सायाव रायज्लायनो खाबु मोनो। बेफोर खाबुफोरखौ गोरों सोरबा बिजाथिआ भट होगिरिफोरनि गोसोखौ बोनो हानायनि खाबु होनायबादि जायो। बे समावनो गोरों भट सोगिरिफोरा सोनाय फिन्नाय खालामनानै हाबाफारिखौ मेहेरगोंना खालामनायखौ नुनो मोन्नाय जायो। रावबो बिजाथिआनो रावबो भट सोगिरिफोरखौ रां होनानै एबा ब्रा ब्रा भट सोहोनो हाया।
फारसेथिं, बे बिसायखथिनि थाखाय चार्जफोरा माखासे नेम-खान्थिफोरखौ मोनफ्रोमबो राजखान्थि हान्जाफोरनो होनानै गामि गामि, न’ न’ थांनो हानाय खाबुफोरखौबो होनाय जादों। नाथाय मोनफ्रोमबो बेफोरबादि Campaign फोरखौ नायनो थाखाय Mizoram People’s Forum (MPF) आरो चार्जजों दैखांजानाय सैमा सिखारिफोरा नायगासिनो दं होन्ना मिथिनो मोन्नाय जायो।
दासान्दि MPF दोलोआ माखासे आयेनपोरखौ रेहाय होनाय जादों आरो न’ न’ थांनानै Campaign खालामनो थाखाय खाबुखौ होनाय जादों नाथाय बेफोर खामानिखौ मावफुंनायाव MPF नि दैदेनगिरिनि मोनफ्रोमबो खोथाफोरखौ मानिनानै सोलिनो नांगोन। MPF आ बेफोर खामानिखौ मावगासिनो जाहाथे बिसायखथिनि समाव रांनि गोहोआ खाबु मोना। हादोरनि गोजोनसिन हादोरसा मिजरामाव बेफोरबादि मावफुंनाय खामानिफोरा गोजोन हादोरसाखौ गोजोनसिन खालामनाय खामानिआव दाजाबदेरगोन होन्ना मिजिं थिनो हायो।
मखनो गोनांदि मिजराम हादोरसायाव एसेमब्लि बिसायखथिनि थाखाय Campaign खालामनाया गोख्रोङै सोलिगासिनो दं। गासै सा 209 बिजाथिफोरा Campaign होनायाव आयेन बादियै थैख्रां थांख्रां जुजिलायगासिनो दं होन्ना खौरां मोन्नाय जायो। गुबै बादायलायनाया खुंथायाव थाखाय कंग्रोज दोलो आरो मिजराम ओनसोलनि राजखान्थि हान्जा Mizo National Front (MNF) नि गेजेराव जागोन। फारसेथिं बिजेपि दोलोआ क्रिस्टानफोरनि हादोरसायाव थानायनि फोरमान होनो थाखाय गोख्रों Campaign होनानै जुजिगासिनो दं आरो गोख्रोंसिन खालामनो थाखाय बिजेपि दोलोनि आफादगिरि अमिट साहा आरो दोलोनि गेदेमा दैदेनगिरि राजनात सिंह बिथांआबो हादोरसायाव नुजाथिफैखाबाय।
बिजेपि दोलोनि दैदेनगिरि बिथांआ माखासे खोथा होयोदि- मोनफ्रोमबो हादोरसानि राजा लामाफोरखौ लुफामफिनगोन, मोन 3 इन्जिनियारिं सोलोंसालिमाफोरखौ लुफुंगोन, मोन 2 मेडिकेल सोलोंसालिमाफोरखौ लुफुंगोन आरो गं 3 नार्सिं सोलोंसालिमाफोरखौ लुफुंगोन जुदि देलेखौ देरहासारहोयोब्ला होन्ना बिथांआ बुंबावो।
आफादगिरि आमिट साहा बिथांआ मिजराम हादोरसानि मोनथाम जायगाफोर फारियै Lawngtlai, Champhai आरो Vairengte फोराव Campaign खालामनानै खुंथायाव थानाय कंग्रेज सरकारखौ सोंखारिनानै बुङोदि- कंग्रेज दोलोआ हादोरसानि रांफोरखौ मोजाङै बाहायनो रोङाखै आरो जेबो जौगाखां खामानिफोरखौ मावाखै होन्ना बुङो। गासै सा 39 बिजेपि दोलोनि बिजाथिफोरा बिसायखथिआव बाहागो लागोन होन्ना मिथिनो मोन्नाय जायो।