मिरु सरकारा आसाम हादोरसायाव इतानल दिहुन्नो गासै 1,259 कौटी रां बाहायगोन
गुवाहाटी,मार्च 4: मिरु सरकारआ औवा बिफानिफ्राय फिन बाहायजाफिनग्रा इतानल थाव दिहुन्नो थाखाय आसाम हादोरसायाव गासै 1,259 कौटी रां बाहायनो थांखि लादों।
खौरां मोन्नाय बादिब्ला सिरां जिल्लानि सिङाव थानाय बंगाइगांव थाव सोदांग्रा एबा बीआरपिएलआ “बेम्बु-इतानल फुयेल प्रजेक” नि गेजेरजों मिरु सरकारनि कौटी रांखौ बाहायगोन।
सा-सान्जा ओनसोलफौराव औवा बिफांनि सम्पदआ जोबनो गैया, गुबैयै आसाम हादोरसायाव बांसिनै मोन्नाय जायो। औवा बिफांआ जायकिजाया जायगायाव गायोब्लानो थाङो। बेफोरखौ नोजोर होनानै मिरु सरकारा सा-सान्जा ओनसोलनिफ्राय भारत हादोराव गोनांथि जानाय थावखौ दिहुन्नो आखायाव लादों। फैगौ 2022 माइथायनि गेजेराव भारत हादोराव गुबुन हादोरनिफ्राय सोनारनानै लाबोनाय थावखौ 10 जौखोन्दो खमायनानै हादोराव नांगौ जानाय थावखौ हादोरावनो दिहुन्नो थाकि लादों होन्ना थाव खाम्पानि (Oil Industry) मावख’निफ्राय मिथिहोयो।
Oil Industry मावखनिफ्राय मिथिहोयोदि, “खम्पानिया Biofuel Refineries आव आबाद मैगं थायगंनि गार्जानाय बेसाद आरो बायदि बायदि गार्जानाय मुवा बेसादफोरनिफ्राय रां गारनानै इतानल थावनि दिहुन्थायखौ बांहोनो आखायाव लादों, मिरु सरकारनि हेफाजाबआव हादोरनि थावनि फालांगिखौ फैगौ 2022 माइथायनि गेजेराव $15 बिलियन बांहोनो थांखि लादों”
सा-सान्जा ओनसोलफोराव गोरलैयैनो मोन्नो हानाय औवा बिफांनिफ्राय बोसोरफ्रोमबो 60 मिलियन लिटार इतानल थाव दिहुन्नानै Biofuel थावनि दिहुन्थायखौ बांहोनो आरो गुबुन हादोरनिफ्राय लाबोनाय क्रुड थावखौ खमायनो नुमिलिगड़ थाव सोदांग्रा खम्पानिआ मावफुंगासिनो दं।
मिरु सरकारआ बंगाइगांव थाव सोदांग्रा खम्पानि एबा रिफाइनारिनिफ्राय औवा बिफांखौ बाहायनानै इतानल थाव दिहुन्नो गासै 1,259 कौटी रां बाहायनो थाखि लादों होन्ना Oil Industry मावख’निफ्राय मिथिहोयो।
मिरु सरकारनि पेट्रलियाम बिफान्नि मंत्की धरमेन्ड्र प्रधान बिथांआ थांनाय सुक्रबाराव बुंदोंदि, “आसाम हादोरसाखौ सोलाइनाय लाबोनानै पेट्रल, डिजेल आरो गुबुन गुबुन हाइड्रकार्बन दिहुन्नानै खोला एसियान हादोरफोराव थानाय गुबुन गुबुन हादोराव दैथायहरग्रा मिरु खालामगोन”।
खोला एसिया हादोरफोराव नांगौ जानाय हाइड्रकार्बननि दिहुन्थायखौ बांहोनो थाखाय सा-सान्जा ओनसोलफोराव थानाय थाव खम्पानि एबा रिफाइनारिफोरवा मुलाम्पा जानाय रांखौ खम्पानिआव नांगौ जानाय फसंथानफोर (Infrastructures) लुफुंनायाव गारनो प्रघान बिथांआ खावलायो।
सा-सान्जा ओनसोलफोर आव थानाय मोन 8 हादोरसाफोरखौ फोनांजाबनो थाखाय थाव खम्पानिआ 1,650 कि.मिटार गेस ग्रिद प्रजेक लुफुंनो गासै 9,225 कौटी रां बाहायनाय जायो आरो फैगौ 5 बोसोराव ONGC खम्पानिआ गासै 1,300 कौटी रां बाहायनो थांखि लादों होन्ना खोरां मन्नाय जायो। थांनाय 5 बोसोराव थाव खम्पानिआ जेसेबां मुलाम्पा जादोंमोन बेनिफ्रायबो 30 जौखोन्दो बांसिन रांखौ थाव दिहुन्थायाव नांगौ जानाय खामानिफोराव बाहायनाय जादों होन्नाबो मिथिनो मोनबावनाय जायो।
