राज्योफ्रानो सेरफांगुरि चौरायदाखानि हेल दैमायाव औवानि दालां बानायना लादों

क’कराझार,डिसेम्बर 21: बिटिसि खुंथायनि सिङाव थानाय क’कराझार जिल्लानि सेरफांगुरि –कलबारिनि सेरजों बोहैलांनाय हेल दैसायाव ओनसोलनि राज्यो राजाफ्रा सरकारनि जेबो अनसुंथायनि हेफाजाब लाया लासे गावसोरनो हान्था-मेलानि थाखाय गंसे औवानि दालां बानायना लादों। बे दालांखौ बिथांमोनहा बोसोरफ्रोमबो बानायनो गोनां जायो। मानोना दैज्लां बोथोर फैनाय लोगो लोगोनो भुटान हाजोनिफ्राय लोमसावबोनाय दैआ अरायथा नङै दालांखौ बोसोरफ्रोमबो बुखारनानै लाङो अब्लाना मोन 12 सो गामिनि सुबुंफोरा सेरफांगुरिआव फैनो हानाय ससे लामाखौनो बेसेबांबा किल’ मिटार गोजानजोंसो गिदिंनानै फैनांगौ जायो।

सेरफांगुरि हाथाय आरो फरायसालिफोराव थोंजों फैनो राहा खालामना होनो थाखाय बिटिसि खुंथायनो गोबांबार फोरमायनाय जाबाय होन्नानै जायगानि सुबुंफोरा फोरमायनाय जादोंब्लाबो दिनैसिम बानायनानै होआखै, अदेबानि ओनसोलनि एम सि एल ए ज्यतीरिन्ड्र औवारि (जोमै) बिथांआ गावनि आखायाव थानाय रांखौ एफा-एनै बाहायनानै राज्योफोरनो दालां बानायनाय समाव राज्योफोरनि जानाय लोंनायनि गोनांथिखौ सुफुंनानै होनाय जादों। बे लामाया जायोब्ला थोंजोङै – थाइगिरगुरि, महनपुर, हाथिदुरा, जानागांव, सापकाता, सौरायधाका, गोदान इस्लामपुर, बदरपुर आरो मयनागुरिआव थांनो थाखाय खाबु जायोमोन। नाथाय सरकारा बे लामाखौ दिनैसिमबो बानायनानै होयैआव ओनसोलनि राज्यो राजाफ्रा खुद्रिखांनाय फोरमायदों, आरो बिसायखथि फैयोब्ला दालां बानायनायनि बाथ्रा बुङो होन्ना बुङो।

मिथिनो मोन्नाय बादिब्ला हेल दैसा बारनायनि बैफोर गामिफोराव बर’, सावथाल, नेपालि आरो राभाफोर दंसोगारो आरो बिसोरो औवानि दालां बानायनाय समावबो गाव गावसोरनि गामिनिफ्राय औवाखौ खांनानै लाबोनानै जयैनो हाबा मावलायो।

खुद्रिखांनाय राज्योफ्रा भारत उदांस्रिनि 71 बोसोर उनावबो सादा-बुसा राज्योफोरनि जेंनाखौ सुफुंनानै होयैनि थाखाय बिजेपि सरकारखौ सोंखारियो आरो गोरिबफोरखौ नायग्रा सरकारखौ गावसोरनो गोनांथि जानाय आर सी सी दालांखौ लुफुंना होनो थाखाय खावलायो। मानोना बे दालांआ जायोब्ला फरायसालिआव फरायसाफोर थांनो थाखाय जोबोर खाबु जागोन लोगोसे गोग्लैनानै थानाय ओनसोलाबो जौगाखांनाय फैगोन होन्ना मिजिं लादों।

हेल दैमायाव दालां नांगौनि सायाव दतमा बियाबनि एम सि एल ए ज्यतीन्ड्र औवारि बिथांआ फोरमायोदि गाव बे जेंनानि सायाव बिटिसिनि एसेमब्लिआवबो सोंदि दैखांखांबाय अब्लाबो दासिमबो बिनि जेबो बिथांकि लायाखै अब्लाबो गाव ओनसोलनि राज्योफोरनि जेंनाखौ नोजोर खालामनानै गाव जा एसे हायो अनसुंथाय होनानै बे औवा दालां बानायनायाव हेफाजाब होयो होन्नानै फोरमायो।

फार्सेथिं बे ओनसोलनि राज्योफोरनि जेंना आरो गोनांथिखौ नायनानै सरकारनि बिथिंनिपफ्राय नायफामनाय हाबाफारिआ माब्लालांखायावनो जाखाबायमोन होन्नानै मिथिनो मोन्नाय जादों। बेखौ नोजोर खालामोब्ला बे हेल दैमायाव आरोबाव दालां बानायनायनि हाबाफारिआ सानसे नङा सेनसे जाफुनायनि मिजिं लानो हायो।