इम्फल,मार्च 20: हादोरारि कंग्रेस राजखान्थि दोलोनि आफादगिरि राहुल गान्डी बिथांआ सा-सान्जा ओनसोलफोराव फैगौ लख सभा बिसायखथिखौ नोजोर होनानै देरहासारनायनि मिजिं लानानै सांग्रांथिआरि मेल खुंफुंनायखौ जागायबाय।
खौरां मोन्नाय बादिब्ला बिथांआ बिसायखथिनि सांग्राथिआरि मेल जथुमाखौ अरुनाछल हादोरसानि इतानगर आव बेखेवनानै होयो। बिथांआ मनिपुर हादोरसायाव सान्नैनि हाबाफारि लानानै मंगलबारनि बेलासिआव मोनफैयो।
कंग्रेस दोलोनिफ्राय खौरां मोन्नाय बादिब्ला राहुल गान्डी बिथांआ मनिपुर हादोरसानि मोन्नै लख सभा बियाबफोरनि थाखाय गावनि दोलोनि बिजाथिखौ सावरायनानै फोसावनानै होगोन। फारसेथिं भारतीय’ जनता पार्टी राजखान्थि दोलोआबो दोलोनिफ्राय बिजाथिखौ फोसावनानै होथ’आखै होन्ना मिथिनो मोनो।
राहुल गान्डी बिथांआ मरिपुर हादोरसायाव सफैनाय लोगो लोगो मुंख्लं मिनारनि खाम्पायाव बिबार बावो आरो आयजो बाजार एबा महिला बाजार (Ima Keithel) आव गिदिंग्लाङो। बेजों लोगोसे ओनसोल आव थानाय कंग्रेस दोलोनि मावख’आव दोलोनि सोद्रोमाफोरखौ माखासे बोसोन होयो होन्ना मिथिनो मोनो।
राहुल गान्डी बिथांआ बुधबारनि फुंबिलिआव पेलेसनि नब्लांआव फरायसाफोरजों सावरायनाय हाबाफारि लादों आरो बेनि उनाव हापता कांगजैयबुंग आव सुबुं थुबुरमायाव बिबुंथि लाकिगोन होन्ना मिथिनो मोनबावनाय जायो।
मनिपुर हादोरसायाव मोनथाम बोसोराव देरहासार जाबोनानै खुंथायाव थाबोनाय कंग्रेस दोलोआ थांनाय एसेमब्लि बिसायखथिआव गासै मोन 28 मासि आवग्रिनो हादोंमोन, फारसेथिं बिजेपि दोलोआ गासै मोन 21 मासिल’ आवग्रिनो हादोंमोन। नाथाय बिजेपि दोलोआ माखासे गुबुन गुबुन दोलोनि MLA आरो उदां बिजाथि देरहासारनाय बिथांमोनि हेफाजाब आव मनिपुर हादोरसायाव सरकार दाफुंनो हादोंमोन।
मनिपुर हादोरसानि बार्ग गिबि मंत्री आरो कंग्रेस दोलोनि आयेनदागिरि अक्राम आइबबि बिथांआ बुङोदि, हादोरसायाव राहुल गान्डी बिथांनि नुजाथिनाया सुबुंफोरखौ सांग्रां खालामगोन आरो डेमक्रेटिक मोन्थायनि गोहोखौ कंग्रेस दोलोनि थाखाय लाबोनानै होफैफिनगोन, जाय गोहोखौ थांनाय एसेमब्लि बिसायखथिनि उनाव सेखनानै लांदोंमोन। (IANS)