रोजा रोजा सुबुंफोरा आलादा राज्यो बड’लैन्ड दाबिनानै धर्ना होदों
गुवाहाटी,डिसेम्बर 24: गोबाव सम जालांनाय बर’फोरनि गुबै जेंना, आलादा राज्यो बड’लैन्डनि दाबिखौ लानानै दुलाराय आसाम फरायसा आफादजों लोगोसे नेशनेल डेमक्रेटिक प्रन्ट अव बर’लेन्ड-प्रग्रेसिव, जयेन एक्सन खमिटी पर बर’लैन्ड मभमेन्ट आरो गुबुन गुबुन आफादफोरा खौसेयै ओंखारनानै बीटीएडि ओनसोलनि गुबुन गुबुन जिल्लाफोराव दिनै फुंनि 10 रिंगानिफ्राय धर्ना होयो।
खौरां मोन्नाय बादिब्ला बिथांमोनहा बड’लैन्डनि दाबिखौ राजखान्थिआरि बिथिंआव सावरायनायनि गेजेरजों थाबैनो सुस्रांना होनांगौ होन्ना दाबि खालामदों आरो हादोरनि गाहाय मनट्री नारेन्ड्र मोडी बिथांखौ आसामाव बरायदों।
क’कराझार जिल्लानि इंन्डीयान वयेलनि खाथिआव थानाय गथासाफोरनि गेलेगा एबा चिलड्रेन पार्कआव बड’लैन्ड सोमावसारआरि आफादफोरनि रोजा रोजा सोद्रोमाफोरानि बाहागो लानायखौ नुनो मोन्नाय जादों। सोमावसारआरि आफादफोरा सिरां जिल्लानि काजलगांव, बाक्सा जिल्लानि मुसलपुराव, आरो उदालगुरि जिल्लाआव धर्ना होदों होन्ना खौरां मोन्नाय जायो।
रोजा रोजा सुबुंफोरा आखायाव बेनार आरो प्लेकार्ड लानानै बाहागो लादों आरो आलादा राज्यो बड’लैन्डनि दाबिखौ रांजखान्थिआरि बिथांआ सावरायनानै थाबैनो सुस्रांना होनांगौ होन्ना दाबि खालामदों, बेजों लोगोसे बिथांमोनहा गोदान दिल्लीनि फारलियामेन्ट सोलिफुबाय थानाय समाव बड’लैन्ड दाबिनि जेंनाखौ सावरायनांगौ होन्ना दाबि दैखांदों।
गोबाव सम जालांनाय बड’लैन्ड दाबिनि जोंनाखौ सुस्रांना होनो जेबो राहा लायाखौ होन्ना बिथांमोनहा खुंथायाव थानाय नेशनेल डेम’क्रेटिक एलाइस दोलोखौ बायदि बायदि रावजों सोंखारियो।
लोगोसे सोमावसारआरि आफादफोरा ओनसोलाव गोजोन आरो जौगाखांनाय लाबोनो थाखाय जेसेबां हायो एसेबां थाब अरायनि थाखाय सुस्रांना होनांगौ होन्ना दाबि खालामबावो।
गुबैयै बिथांमोनहा आलादा राज्यो बड’लैन्ड दाबिनि सायाव नोजोर होनानै हादोरारि मावफारिया लानांगौ, राजखान्थियारि बिथिंआव बड’लैन्ड दाबिनि जेंनाखौ सावरायनांगौ, 2014 माइथायाव बिजेपि दोलोनि बिसायखथिनि मेनिपिस्ट’आव होनाय खोथाखौ सुफुंना होनांगौ, बड’लैन्डनि बायजोआव थानाय बर’फोरनो राजखान्थिआरि मोन्थायखौ होनांगौ आरो आसाम हादोरसानि सिङाव थानाय कार्बि आंलं आरो दिमा हासाव जिल्लाफोराव थानाय बर’फोरनो सेडियुल ट्रायब (हाजोआरि) बिमुंखौ होनांगौ होन्ना दाबि खालामदों।
बे हाबाफारिआव दुलाराय बर’फरायसा आफादनि आफादगिरि प्रमद बर’, गाहाय नेहाथारि लरेन्स इसलारि, नेहाथारि खोरोमदा औवारि, बार्ग राज्य’ सभानि MP आरो इउनायटेड पिपल्स पार्टी लिबारेलनि आफादगिरि उरखाव गोरा ब्रम्ह, बिथांमोनहा बड’लैन्ड जेंनाखौ सुस्रांना होनो थाखाय जेबो राहा लायैलाय मिरु सरकारखौ दैदेन्नाय एनडीए सरकारखौ सोंखारियो।
