शिव सेनाया नोगोरारि सोदांनाय बिल 2016 खौ हेंथा खालामगोन
गोदान दिल्ली, जानुवारि 7: मिरु सरकारनि मावपारिया बादियै जेंना गोनां (नोगोरारि) सोदांनाय बिल 2016 खौ पारलियामेन्ट आव शिव सेनाया बेरेखा खालामगोन। रबिबाराव लाइजामनि गेजेरजों शिव सेना राजखान्थि दोलोनि गाहाय सन्जय रौवात बिथांआ पारलियामेन्ट आव बेरेखा खालामगोन होनान फोरमायहरो।
“असम गन’ परिदआ आसामिया माहारिनि लुबैनाय बादि राव, हारिमु, थुलाइ आरो आसार खान्थिफोरखौ रैखाथि होनो थाखाय जोंखौ खावलायहरनायलाय जों पारलियामेन्ट आव बिलनि हेंथायै बेरेखा खालामगोन”रौवात बिथांआ बुङो।
बिथांआ बुङोदि, “जुदि नोगोरारि सोदांनाय बिल 2016 खौ पारलियामेन्ट आव थिसनगोन अब्ला जौसिन बिजिरसालिनि बिथोन बादियै गोलाव समनिफ्रायनो मावबोबाय थानाय नेशनेल रेजिस्तार ऑव चितिजेनस्व (NRC) आ जेबो ओंथि गोयै जागोन”।
नोगोरारि सोदांनाय बिल 2016 खौ नायबिजिरनानै रिपर्ट जमा खालामनो थाखाय मिरु सरकारजों दाफुंजानाय जयेन पारलियामेन्टारि खमिटिआ पारलियामेन्टनि लख सभा जथुमायाव जमा होनायनि सिगां ओंखारबोबाय। बेयो मोनसे गोजोन्थाव बाथ्रा।
