समाज सिबियारि सचिन्ड्र नात बसुमथारिआ जोबथा हां बोबाय
क’कराझार,डिसेम्बर 19: क’कराझार जिल्लानि सिङाव थानाय हादानफारा गामिनि सिरियै समाज सिबियारि सचिन्ड्र नात बसुमथारि बिथांआ बोराय बैसोनि नारसिन्नायाव गोबाव सम लोमजानायनि जाहोनाव गावनि देरायावनो समारखालि जोबथा हां बोबाय। बिथांआ गावनि सा 5 फिसाजोफोरजों लोगोसे फिसौजो आरो फिसौज्लाफोरखौ नागानानै थांबाय। बिथांआ गासै 72 बोसोर बैसोआव आगान सुरबायमोन।
बिथांखौ दानि जाखांफुनाय लाइमोनफोरा सिनाया आरो मिथिआब्लाबो बिथांआ बर’ समाजआरि हाबा मावनायफोरजों लोगोसे थुनलाइ सिबिनाय आरो थुनफाउथाय आयदाफोराव बिथांनि गोबां बिहोमा दं।
थुनलाइनि फारसे बिथांआ मुंथांखा लिरगिरिफोर फारियै- कमल कुमार ब्रम्ह, प्रसन्जित ब्रम्ह, निल कमल ब्रम्ह आरो क’कराझार जिल्लानि गुबुन गुबुन लिरगिरिफोरजों गोथौयै सोमोन्दो दंमोन।
बिथांआ कमल कुमार ब्रम्हजों लोगोसे बर’ रावखान्थि (Bodo Grammar) खौ लिरदोंमोन आरो बिथांआ माखासे खन्थाय बिजाबफोरखौबो बर’ रावजों लिरनानै गालाबाय, जायनि थाखाय बिथांखौ गोसोखांनाया गासै बर’ माहारिनि थाखाय गोनां जानानै फैदों।
बिथांआ गावनि लिरनाय माखासे खन्थाय आरो रायथायफोरखौ रांनि आंखालाव बिजाबनि महर होनो हायाखैब्लाबो बिथांआ गोबां समावनो गुबुन गुबुन आफादफोरजों दिहुनजानाय मेगाजिन आरो सभेनियर बिजाबफोराव लिरनानै गालांबाय।
मखनो गोनांदि बिथांनि मोनसे लिरनाय खन्थाया गोजौ फरायसालिनि थाखोनि बर’ एबा बिमानि राव आयदायाव सेबखांजादोंमोन।
बसुमथारि बिथांआ 1946 माइथायनि 1 एफ्रिल दानाव जोनोम मोनदोंमोन। बिथांआ बर’ थुनलाइजोंल’ लोब्बा गैयामोन नाथाय बर’ टियाथारजोंबो लोब्बा दंमोन। बिथांआ थुनफाउथाय लिरनायजों लोगोसे गुबुन गुबुन थुनफाउथाय दिन्थिनायफोरावबो गुबुन गुबुन रल लानानै फाउ खालामबोदोंमोन।
बिथांआ सासे दै जगायनाय (Irrigation) बिफान्नि Upper Divisional Assistant नि बार्ग मावफुं सोद्रोमामोन।
मखजाथावदि बिथांआ सासे बयजोंबो गोरोबनो हानाय गोहोआ दंमोन। बिथांखौ बयबो मानियोम आरो बिथांआ खस्थ खालामग्रानि गेजेराव सासेमोन।
क’कराझार ओनसोलनि गोबां सुबुंफोरा बिथांखौ जोबथा समाव बिदाय होयो।
मखनो गोनांदि बिथांआ सासे बयजोंबो मिथिसारजानाय मुंदांखा थुनलाइ सिबियारि आरो फाउगिरि नङाब्लाबो सिरियै थाखोमानाय बादियै बिथांआ बर’ समाज जौगाखांनायनि फारसे गोबां बिहोमा होलांबाय।
फारसेथिं दुखुनांथाव बाथ्राया बेबोदि क’कराझार जिल्लायाव थानाय बर’ हारिनि सासे गोख्रों गेलेगिरि सानजिब उजिर बिथांआबो थांनाय 13 डिसेम्बराव जोबथा हां बोबाय।
मोखां बिजाबनि गेजेरजों खौरां मोन्नाय बादिब्ला बिथांआ बर’ हारिनि गेजेराव सासे साबसिन आरो गोख्रों भलि बल गेलेगिरिमोन जाय बिथांआ आसाम हादोरसानि जानानै नेसनेल टुर्नामेन्टआव गोबां केब गेलेदों। बिथांनि भलि बल बुक्लायनायाव हाफोरा गुनानै हाद्रि जाना बिरफुंलायोमोन होन्नाबो खौरां मोन्नाय जायो।
गुसुङै बुंनो थाङोब्ला 2018 माइथाया बर’फोरनि थाखाय फारफ्रोमबो बिथिंखौ नोजोर होयोब्ला बांद्राय मोजाङै जोबनानै थाङासै। बड’लैन्ड सोमावसारनायनि मुंआवबो माखासे सुबुंफोरा जिउ खोमानो गोनां जाबावबाय आरो गोबां सुबुंफोरा जखम जानानै थालांबावबाय, गोबां सुबुंफोरा उटकारिनि मुंआव पुलिसजों खाजानांबाय, जोबथेसालिआव थानांबाय, नाथाय दासिमबो बर’फोरनि जेंनाखौ बोस्रांनायनि लामा लायाखै। फैगौ गोदान बोसोर 2019 माइथायाव बर’फोरनि खाफालआ गेवगोन होन्नानै जों मिजिं थियो।
