सासे असमिया Software Engineer आ ULFA(I) उटकारि दोलोआव मुं थिसनबाय

गुवाहाटी,नवेम्बर 30: सम सोलाइबोनायजों लोगोसे दासान्दि असमिया लाइमोनफोरा उटकारि हान्जानि दोलोआव मुं थिसनबोनायखौ थांनाय दान मेन्नैसो सिगांनिफ्रायनो नुबोगासिनो दं। बेबादिनो दिनैबो मोखां बिजाबनि 4 मिनिट भिडिवनिफ्राय मिथिनो मोन्नाय जायोदि, आसामनि मरान होन्नाय ओनसोलनि सासे Software Engineer आ गावनि हारिमु एबा असमिया हारिमुखौ रैखाथि होनो थाखाय सरकारनि बेरेखा नांनो उटकारि हान्जानि दोलोआव मुं थिसनबाय।

बिथांखौ मोखां बिजानि गेजेरजों Chow Abhijeet Gogoi मुङै मिथिनाय जादों। बिथांआ 4 मिनिट भिडिवनि गेजेरजों बुङोदि, “आं अभजित गगय, रुंसारि हरि चन्ड्र गगयनि फिसाज्ला, आं डिब्रुगड़ जिल्लानि सिङाव थानाय मरान ओनसोलनि थागिरि, चेन्नाय RMS University निफ्राय 2012 माइथायाव Information and Technology आयदायाव दिग्रिखौ फोजोबदों, आं software engineer हिसाबै ‘Hitashree’ खम्पानिआव खामानि मावदोंमोन, बेनि उनाव आं Bangalore Business School and Management आव MBA नि थाखाय मुं थिसनदोंमोन, आं गुबुन गुबुन हादोरफोरावबो गिदिंनानै फैबाय जेरै- सिंगापुर, मालाइसिया आरो ऑश्ट्रलिया, आरो आं दासान्दि बेंगालरनि SAP technology आव Senior Software Engineer हिसाबै जोबथा खामानि मावनानै फैबाय”।

बिथांआ भिडिवनि गेजेरजों दानि असमिया माहारिनि थासारिफोरखौ नोजोर होनानै दुखुमोन्नानै जेबो राहा मोनैलाइ असमिया हारिखौ फोथांना लाखिनो उटकारि दोलोआव हाबनो गोनां जादों आरो गावबादि लाइमोन सेंग्राफोरा असमिया माहारिखौ फोथांना लाखिनो थाखाय उटकारि दोलोआव मुं थिसननांगौ होन्ना बुङो।

“जुदि लाइमोनफोरा दावहारु हान्जायाव मुं थिसनाब्ला रावबो जोंजों लोगोसे जुजिनो थाखाय फैला... जों सानसे जोबस्रांलांगोन” होन्ना बिथांआ बुंबावो।

बिथांआ आमेरिका हादोरजों रुजुनानै बुङोदि, थागिबि सुबुंफोरा जोबसांलांनायनि लामाथिं थांगासिनो दं।

मखनो गोनांदि, थांनाय दान मोन्नैसो सिगांनिफ्रायनो असमिया माहारि आरो सिनायथिखौ रैखाथि होनो असमिया लाइमोनफोरा सरकारजों बादा होजानाय ULFA(I) उटकारि दोलोआव मुं थिसनगासिनो दं, जेरै अभिजित गगय, मुन्ना बरुवा आरो गोबां।