गुवाहाटी,अक्टबर 24: “गुबुन हादोरनि बाथ्राफोरखौ लानानै जों हाबदेरा” होन्ना सिन हादोरा आसामनि उटकारि हान्जा एबा इउनायटेड लिबारेसन प्रन्ट अव आसामनि (ULFA) गाहाय परेस बरुवा बिथांनो जायगा होआखै होन्ना बुङो।
सिन हादोरनि राजथावनि बेजिंगनिफ्राय भारत हादराव बोखौबो मिथिहोहरोदि, “सिन हादोरा पाकिस्तान हादोरनि हादोरनांआरि उटकारि हान्जा ‘मासुद आझाहर’ नि बेरेखायैबो जों जोंनि मावफारिया बादियै मावगासिनो दं”। बे बाथ्राखौ जेब्ला गोदान दिल्लीआव जेब्ला मासुद आझाहर इस्लामिक उटकारि दोलोखौ गोसो जायगानि फारिलाय एबा Blacklist आव दोन्नो थाखाय मेल लादोंमोन।
भारतनि नखर मनट्री राजनात सिंह आरो सिन हादोरनिफ्राय फैनाय झाव केझि बिथांजों गोदान दिल्लीआव गोजौ थाखोनि मेल लायो आरो गोदान दिल्लीआ इउनायटेड नेसनाव LeT उटकारि हान्जानि गाहाय आझाहर बिथांखौ हादोरनांआरि उटकारि हान्जानि फारिलाइआव दोन्नो थाखाय थालांनाय गसर बिलाइखौ बोखांफिन्नो खावलायो।
मासुद आझाहर उटकारिनि जेंनाखौ लानानै भारत हादोरनि हांख्रायहरनाय बादियै जों गोबां समावनो मिथिहोखाबाय, आरो जों जोंनि मावफारियाबादि खामानिफोरखौ मावबोगासिनो दं। सिन हादोरा उटकारिनि बेरेखा संदान्नाय खामानिफोराव गोबां समावनो बाहागो लाबोगासिनो दं होन्नानैबो सिन हादोरनि गुबुनारि बिफान्नि मनट्री हुवा चुनायिंग बिथांआ बुङो। मोजां गाज्रि सान्नानै जों जोंनि मावथांखि लायो आरो खामानिफोरखौ मावफुंङो होन्ना बिथांआ बुंदेरो।
मख’नो गोनांदि, 2016 माइथायाव उटकारि ‘आझार’ बिथांआ मेलेम बाहायनानै भारत आर्मिनि बादाखौ गाग्लोबदोंमोन, 2008 माइथायनि 26 नबेम्बरनि मुम्बाइखौ गाग्लोबनाय एबा Mumbai Attack आवबो बिथांआ लोब्बा दंमोन। सिन हादोर आरो पाकिस्तान हादोरजों गोरोबथा जानायनि थाखायनि पाकिस्तान हादोराव जोनोम मोन्नाय हादोरनांआरि उटकारि हान्जा मासुद आजाहरखौ UN नि फारिलाइआव दोन्नो थाखाय आरज बिलाइ गथायाया थालांदोंमोन। फारसेथिं उटकारि हान्जायादि भारत हादरखौ गाग्लोबगासिनो दं बेनि सोमोन्दै सिन हादोराव जेबो फोरमान बिलाइ एबा गाग्लोबनायनि बिदिन्थि मोन्नाय जायाखैमोन।
बे मेलनि गेजेरजोंनो सा-सान्जा हादोरसानि उटकारि हान्जा ULFA नि गाहाय परेस बरुवानि सोमोन्दै सोंनायाव हु बिथांआ बुङोदि, सिन हादोरनि सरकारा मोनसे धोरोमखौ फालिबोदोंदि- गुबुन हादोरनि बाथ्राखौ लानानै बै हादोराव हाबदेरबोआखै आरो बे धोरोमखौ सोलायनो हाया”।
मख’नो गोनांदि, आसामनि परेस बरुवा बिथांआ सिन हादोराव थांगासिनो दं आरो सिन हादोरनिफ्राय भारतनि सा-सान्जा ओनसोलाव हाथियार लाबोगासिनो दं।