हाग्रा ओनसोलखौ दानस्रांनायनि दायाव साबा सुबुंखौ खायो
क’कराझार,नवेम्बर 22: क’कराझार जिल्लानि कालासि जौगाखां बल्कनि झारबारि रेन्स सिङाव थानाय हाग्रा ओनसोलखौ दानस्रांनायनि दायाव सा 5 थागिबि सुबुंफोरखौ खायो। हाग्रा बिफान्निफ्राय खौरां मोन्नाय बादिब्ला सा 5 दायनिगिरिफोरा झारबारि हाग्रा ओनसोलाव न’ लुनानै थानो एबा आबाद मावनो माखासे झारबारि हाग्राफोरखौ दानस्रांगासिनो दंमोन।
हमजानाय दायनिगिरिफोरखौ फारियै- समर बसुमथारि, लला मुछाहारि, निल बसुमथारि, सामलाल ब्रम्ह आरो मन्टु बसुमथारि होन्ना सिनायथि मोन्नाय जायो।
मखनो गोनांदि, मोनसे समाव आसाम हादोरसाया सोरगिदिं हाग्रा ओनसोलजों साग्लोबजानानै दंमोन। समजों लोगोसे थागिबि ट्रायबेल सुबुंफोरा लासै लासै हाग्राफोरखौ दानस्रांनानै झुम आबाद मावबोनो हमो। बे समावनो गुबुन हादोरफोरनिफ्राय फैनानै सनदेह’ गोनां सुबुंफोरा गुवार गोसोनि ट्रायबेल सुबुंफोरनिफ्राय खम बेसेनावनो हाफोरखौ बायनानै न’ लुनानै थाबोयो।
मखनो गोनांदि आसाम हादोरसायाव थानाय मोन 17 ट्रायबेल बेल्ट आरो मोन 30 ट्रायबेल ब्लकफोराव गासै 85,80,842 बिघा हा दं। बेफोर फैलाव गुवार हाफोरखौ भारत उदांस्रि जानाय लोगो लोगोनो ट्रायबेल सुबुंफरनि मुंआव नामजारि खालामनानै दोन्नाय जादोंमोन। बेनिनो गिबिसिन हिसाबै भारत सरकारा 1947 माइथायनि 5 डिसेम्बर दानाव दानि सिदली ओनसोलखौ ट्रायबेल ओनसोल हिसाबै फोसावनानै होदोंमोन अब्ला बै समाव सिदली ओनसोला गवालपारा जिल्लानि सिङाव दंमोन।
बेबादिनो फारि फारियै भारत सरकारा ट्रायबेल सुबुंफोरखौ रैखाथि होनो थाखाय माखासे ट्रायबेल सुबुंफोर आवग्रिनानै थानाय जायगाफोरखौ ट्रायबेल बेल्ट आरो ब्लक ओनसोल हिसाबै फोसावलाङो, जेरै- 1948 माइथायनि 28 एप्रिल दानाव दानि लक्किमपुर जिल्लाखौबो नैथि खेबनि थाखाय ट्रायबेल बेल्ट आरो ब्लक ओनसोल हिसाबै फोसावो। 1948 माइथायनि 12 जुलाइ दानाव दानि दरं जिल्लाखौबो ट्रायबेल सुबुंफोरनि रिजार्व हा एबा ट्रायबेल बेल्ट आरो ब्लक ओनसोल हिसाबै भारत सरकारा फोसावदोंमोन।
दिनैनि दिनाव गुबै सोंथिआ जाबाय ट्रायबेल बेल्ट आरो ब्लकफोराव थाबोनाय गुबुन हादोरनिफ्राय फैनाय सुबुंफोरखै बोखाना होफिन्नो हागोन ना? गोदोनिफ्रायनो राज्यो जाबोनाय ट्रायबेल सुबुंफोरा दिनैसिम मानो हानि फोरमान बिलाइ एबा हा पाट्टाखौ मानो मोनाखै? ट्रायबेल सुबुंफोरा माबोरै गावनि हायावनो माइनरिटि जानानै थाखो? हादोरसा सरखारा ट्रायबेल बेल्ट आरो ब्लकफोरखौ ट्रायबेल सुबुंफोरनो गथायना होफिन्नो हागोन ना? दिनै आसामनि थागिबि ट्रायबेल सुबुंफोरा थानो थाखाय हा गैला।
