डिब्रुगड़,डिसेम्बर 25: मंगलाबाराव आसाम हादोरसायाव बावैसो सिगां लुफुंजानाय बगिबिल दालांखौ बेखेवनो थाखाय हादोरनि गाहाय मनट्री नारेन्ड्र मोडीया हादोरसायाव सफैनायनि सिगांनो ओनसोलफोराव रैखाथि एबा रेकुरिटि हान्जाफोरनि सांग्रांथि जानायखौ नुनो मोन्नाय जादों।
जामिरा साहा बागाननि सिंजों थांनाय लामा, जाय लामाया बगिबिल दालांसिम लानानै थाङो, बै लामाफोराव हादोरसा पुलिस बिफान्नि सोद्रोमाफोरा लामा लामा 100 मिटार जान्थायसो गोजान गोजान फारि फारि गोख्रोङै नोजोर होनायखौ नुनो मोन्नाय जादों। डिब्रुगड़ आरो डिब्रुगड़ जिल्लानि बाहेरायावबो रैखाथि हान्जाफोरा गोख्रोङै नोजोर होदों होन्ना खौरां मोन्नाय जायो। रैखाथि आरो आब्रुथिनि थाखाय सरासनस्रा सुबुंफोरखौ दालांनि खाथिसिम थांनो होनाय जायाखै।
रैखाथि आरो सिखोन साखोनफोरखौ नोजोर होनानै डिब्रुगड़ मुलुग सोलोंसालिनि खाथिआव थानाया दालां आरो बायख्लानाय लामाफोरखौ फोसाबनाय खामानिआव मुखुब जानायखौ नुनो मोन्नाय जादों। राजाबिटा आरो पान्चालि ओनसोलफोराव 37 नं राजा लामाखौ समबारनि हरगेजेरसिम फाहामनायखौबो नुनो मोन्नाय जादों। बेनि सिगांबो सालकुवा, नालियापुल आरो लालुका गांवफोरनि सिंजों थांनाय लामाफोरखौबो फोसाबदोंमोन होन्ना मिथिनो मोन्नाय जायो।
गोजोनथाव बाथ्रादि, आसाम हादोरसानि बगिबिल दालांआ डिब्रुगड़ जिल्लानि बगिबिल आरो धेमाजि जिल्लानि कारेंग घातजों फोनांजाबनाय हिसाबै बुहुम खौरांनि सावगारिआव दैखांजासिगोन। मंगलबारनिफ्राय सा-लक्किमपुर आरो डिब्रुगड़ जिल्लानि जान्थायखौ रेल गारिजों गासै 129.7 कि.मि खमायहोसिगोन आरो 12 घन्टानि सामाखौ 2 घन्टा खावसे समावनो मोनफैनो हासिगोन। गाहाय मनट्री नारेन्ड्र मोडी बिथांआ हादोरसा आरो हादोर जौगाहोनायाव बिहोमा होबोदों।
बगिबिल दालां, जाय दालांकौ लुफुंनो थाखाय अन्थाय खाम्पा गायसंजेन्नायनिफ्राय 21 बोसोर गोलाव सम लाबाय। हादोरनि बार्ग गाहाय मनट्री HD Deve Gowda बिथांआ 1997 माइथायनि 22 जानुवारि दानाव धेमाजि जिल्लानि कुलाजान होन्नाय ओनसोलाव अन्थाय खाम्पा गायसंदोंमोन। थांनाय 2002 माइथायनि 22 एफ्रिल दानाव बिगिबिल दालांनि लुजेन्नाय खामानिखौ जागायदोंमोन आरो बे खामानिखौ हादोरनि बार्ग गाहाय मनट्री अटुल बिहारि बीजपेयी बिथांआ बेखोवनानै होदोंमोन। थांनाय 2007 माइथायाव UPA सरकारा बगिबिल दालां लुफुंनाय कामानिखौ मोनसे हादोरारि प्रेजेक हिसाबै फोसावदोंमोन। सिगां बे प्रजेकखौ मावफुंनो थाखाय गासै 1767 कौटी रां बाहायजागोन होन्ना हमनानै लादोंमोन नाथाय उनाव जाफुंसार जाजासिम गासै 4,996 कौटी रां बाहायजाबाय। बे दालांखौ दैनि जान्थायनिफ्राय 32 मिटार गोजौ लुफुंनाय जादों।
दैमानि अरथाय एबा गुवारआ गासै 10.3 कि.मिटारब्लाबो दालांखौ 4.94 कि.मिटार गोलाव लुफुनाय जादों। दालांखौ लुफुंनो थाखाय मिरु सरकारनि रां बिफाना 75 जौखोन्दोखौ बाहायदों आरो 25 जौखोन्दो रांखौ रेल बिफान्निफ्राय बाहायनाय जादों, जाय बिफानानो दालां लुफुंनायखौ नोजोर होबोदों।
दालांखौ लुफुंनो थाखाय हिन्दुसतान कन्सट्राकसन खम्पानि, जार्मान खम्पानि डि एस बि ब्रैकेबाव आरो भि एन आर इन्पास्ट्राकसार खम्पानिफोरा खामानिखौ 51:20:29 जौखोन्दोआव रानज्लायनानै बानायदों आरो दालांनि खुन्थियाफोरखौ D-Shape बानायदों होन्ना मिथिनो मोन्नाय जायो।
दालां लुफुंनायनि गुबै थांखिआनो जाबाय, हादोरनि रैखाथि होनायजों लोगोसे आसाम अरुनाछलखौ फोनांजावनानै समानै जौगाखां लाबोनाय। बेजों लोगोसे हान्थामेला बिथिंआव फोजौखांनाय लाबोनानै होदोरनि रांखान्थिआरि बिथिंआव गोख्रों खालामनाय।