हिन्दु बांग्लादेसि जेंना: AASU आ दिस्पुर सरकारखौ मेथाय खोनासंबाय थानायनि हुमखि होदों

गुवाहाटी,अक्टबर 3: दिस्पुर सरकारनि नोगोरारि सोदांनाय बिल 2016 खौ हेफाजाब होनानै हिन्दु बांग्लदेसिफोरनो थामोन्था होनो नागिरनायखौ नोजोर होनानै दुलाराय आसाम फरायसा आफादआ हादोरसानि बिजेपिनि खुंथायखौ सोंखारिनायजों लोगोसे हुमखि होयो

जेंना गोनां बिलखौ लानानै जेब्ला मोया आसाम बिधान सभानि जथुमायाव दावराव दावसि जायो आब्ला फरायसा आफादनि हुमखि होनाय बाथ्राया ओंखारो।

खौरां मोन्नाय बादिब्ला दुलाराय आसाम फरायसा आफादनि गाहाय नेहाथारि लरिन ज्यति गगय बिथांआ लाइजामनि गेजेरजों खुंथायाव थानाय सरकारखौ हुमखि होयो, बिथांआ लाइजामनि गेजेरजों फोरमाइहरोदि, थागिबि असमिया माहारिफोरनि बेरेखा गसंथानाया इउनाव थागिबि सुबुंफोरखौ जेंना खालामनायजों लोगोसे असमिया माहारिनि राव, सिनायथि, हारिमुफोरा गोमालांगोन होन्ना बिथांआ फोरमाइहरो।

सर्बानन्द सनवाल बिथांआ बुंगासिदि आसामनि जारिमिनारि आसाम गोरोबथाखौ सिफाया नाथाय गुवाहाटी गोजौ बिजिरसीलिआव एफिदाबिद होनानै नोगोरारि सोदांनाय बिल 2016 खौ होफाजाब होदों होन्ना गगय बिथांआ बुंबावो।

मिरु सरकारा गोबाव समनि थाखाय हिन्दु बांग्लादेसिफोरनो थामोन्था एबा Visa होनो नागिरनायखौबो जों गनाया होन्ना लरिन ज्यति गगय बिथांआ गोख्रों रावजों बुङो।