क’कराझार,फेब्रुवारि 20: बोथोरनि जानाय लोंनायजों सोमोन्दो लाखिनानै मिसिं हारिनि सुबुंफोरा हादोरसानि गुबुन गुबुन जायगाफोराव आलि आइ लिगांग फोर्बोखौ फालिनायजों लोगोसे बड’लेन्ड हालामनि क’कऱाजझार जिल्लायावबो मिसिं हारिनि सुबुंफोरा आलि आइ लिगांग फोर्बोखौ फालियो।
धेमाजि: धेमाजि जिल्लानि जनाइ ओनसोलाव थानाय बिजयपुर गामिआव मिसिं हारिनि सुबुंफोरा आबादजों सोमोन्दो थानाय फोर्बो, जाय फोर्बोखौ “आलि आइ लिगांग” होन्नानै बुंनाय जायो, बे फोर्बोखौ फालियो होन्ना खौरां मोन्नाय जायो।
खौरां मोन्नाय बादिब्ला देग्लायनि आलि आइ लिगांग फोर्बोआनो हादोरसा हारिमु बिफान्नि हेफाजाबआव जिल्ला खुंथाया 20 फेब्रुवारि 2019 आव खुंफुंजानाय गिबि मिसिं हारिनि मोनसे फोर्बो होन्ना मिथिनो मोन्नाय जायो।
बे फोर्बोआव आसामनि गिबि मंत्री सर्बानन्द सनवाल, हारिमु बिफान्नि मंत्री नब कुमार दले आरो लक्किमपुर बियाबनि MP प्रदान बरुवा आरो गुबुन गुबुन मानगोनां बिथांमोनहा नुजाथियो होन्ना मिथिनो मोन्नाय जायो।
धेमाजि जिल्लायाव आलि आइ लिगांग फोर्बोखौ नोजोर होनानै जिल्ला खुंथाया N.I Act 1881 नि आयेन बादियै 20 फेब्रुवारि आव लखेल बन्द’ फोसावदोंमोन आरो सोलिफुबाय थानाय मेट्रिक आन्जाद आरो गोजौ फरायसालिनि आन्जादनि अनगायै मोनफ्रोमबो सरकारि आरो बे-सरकारि फसंतानफोरखौ बन्द’ थाजोबनो खावलायनायदोंमोन।
थांनाय 19 डिसेम्बर 2018 आव आसाम सरकारनि फोसावनाय बादियै नं GAG (81)/ 2016/Pt/1/220 नि आयेन बादियै जिल्लायाव सुबुंफोरनि लुबैनाय बादियै बन्द’ फोसावदों होन्ना मिथिनो मोनबावनाय जायो।
आलि आइ लिगांग ( आसु आबाद मावनाय) जाय फोर्बोखौ असमिया केलेन्डारनि फागुन दाननि गिबि सप्तानि बुधबाराव फालिनाय जायो।
हाबाफारिखौ बेखेवनाय समाव आसु माइ आबादनि बेगरखौ हारिमुनि नेम खान्थिफोरजों फोनानै इसोरनि खाथिआव आरज गाबदों होन्ना मिथिनो मोन्नाय जायो, जाहाथे आसु आबादआ बोथोरजों गोरोबफानानै रुम्बां रुम्बां जाबोयो। बेनि उनाव मिसिं हारिनि “गुमरग” मोसानायखौबो दिन्थिफुंङो होन्ना मिथिनो मोनबावनाय जायो। बेनि उनाव फारि फारियै थुरिजों लुनाय न’सा न’आव जिरायनानै हारिमुनि जानाय लोंनाय, माइरंजों बानायनाय जुमाय आरो ना गोरान आरो अमा बेदरफोरखौ जायो होन्ना खौरां मोनबावनाय जायो।
