गोदान दिल्ली, जानुवारि 8: नोगोरारि सोदांनाय बिल 2016 खौ लानानै पारलियामेन्टनि लख सभा जथुमायाव हाद्रि खुलायबाय।
गोबां गुबुन गुबुन MP फोरा लख सभानि जथुमायाव बिलनि हेंथायै होख्रावदों, नाथाय नखर मंत्री राजनात सिंह बिथांआ बिलखौ फरायथिनानै होनायखौ दोन्थ’आखै आरो बुंलांबाय थादों। MP फोरा बुंदोंदि- बिलआ आयेन बेरेखा, बेयो मोनसे सेकुलार भारत हादोरनि बेरेखा।
ट्रिनामुल कंग्रेजनि MP प्रपेसर सावगाता रय बिथांआ बुङोदि, “जुदि बिलखौ थिसनगोन, अब्ला आसाम हादोरसायाव अर जोंगोन। बिलआ आसामखोल’ सावनाय नङा नाथाय गासै सा-सान्जा ओनसोलखौनो सावगोन, मानोना गोबां थागिबि नोगोरारिफोरा गुबुन गुबुन बिबुंथि होदों”।
नोगोरारि बिलखौ 2016 माइथायनि लख सभा जथुमायाव 1955 नोगोरारि आयेनखौ (Citizenship Act, 1955) सोदांनो फोसावदोंमोन। नोगोरारि आयेन 1955 नि बादिब्ला बांग्लादेस, पाकिस्तान, आपगानिस्तान हादोरफोरनिफ्राय हिन्दु, सिक, बुद्दिस, जैयन, पारसिस, आरो क्रिस्तान हारिनि सुबुंफोर जाय बिथांमोनहा भारत हादराव आयेन बेरेखायै हाबफैनानै दं, बिथांमोनो नोगोरारि एबा थामोन्था होनायनि बिल।
मखनो गोनांदि, सा-सान्जा फरायसा आफाद, दुलाराय आसाम फरायसा आफाद आरो गुबुन गुबुन मोन 30 आफादफोरनिबो बांसिन आफादफोरा दिनै (मंगलबार) 12 घन्टा आसाम बन्द’ होनायाव मोनफ्रोमबो जिल्लाफोराव गोख्रो पुलिस आरो रेकुरिटिफोरनि सांग्रांथिखौ नुनो मोनदों, नाथाय गोबां जायगाफोरावनो धर्ना होगिरि बिथांमोनहा बन्द’खौ हेफाजाब होनानै टायार सावदों आरो बिजेपि दोलोनि मावख’खौबो अर सावनानै होनायखौ नुनो मोन्नाय जादों।
राजनात सिंह बिथांआ बुंदोंदि, “नोगोरारि बिलखौ सोदांनो थाखाय बेसरकारि आफादआ (NGO) हादोरनि मोनफ्रोमबो हादोरसाफोराव थांनानै नायबिजिरदों आरो जयेन पारलियामेन्टारि खमिटिनि फिथायआ बिथांमोनिफ्राय फैदों”
बिथांआ बुंदोंदि, आसाम हादोरसाया गोबाव समनिफ्रायनो आयेन बेरेखायै हाबफैनाय सुबुंफोरनि जेंनाजों मोगा मोगि जाबोगासिनो दं, बेनि थाखाय नखर मंत्रीआ NRC आरो आसाम एकर्डखौ लाबोनाय जादों।
रय बिथांआ सोंथि सोङोदि, भारत हादोरा सेकुलार हादोर आरो सुबुं माहारिनि हादोर जानानै बिलनि गेजेरजों मानो स्रिलंका आरो नेपाल हादोरफोरनिफ्राय फैनाय सुबुंफोरनि मुंखौ मखआखै?
नोगोरारि बिलखौ लानानै पारलियामेन्टनि लख सभा जथुमानि दान्थे बिदान्थेआव कंग्रेज दोलोआ जथुमानिफ्राय ओंखार लाङो।
