क’कराझार,फेब्रुवारि 27: बड’लेन्ड टेरिटरियेल गावखुंथाय काउनसिल खुंथायनि गाहाय हाग्रामा महिलारि बिथांआ मंगलबाराव बुंदोंदि बीटीसी बिधान सभायाव सोदांजानाय माखासे आयेन आरो बिलफोरा आसाम खुंगिरिनि गनायथि मोनाब्ला बिजिरसालिआव थांनो गोनां जागोन”।
खौरां मोन्नाय बादिब्ला बीटीसी खुंथायनि बिधान सभायाव 2019-20 माइथाउनि बाजेत एबा औदितनि जथुमायाव बे बाथ्राखौ बुंदों, मानोना सोदांनाय बिल आरो बीटीसी खुंथायनो दैथायहरनाय माखासे बिफानफोरखौ आबुं आयेनआव गनायथि होनो थाखाय हादोरसा खुंगिरिनि सहि एबा गनायथि मोन्नाया गोनांथि दं। नाथाय माखासे आसाम हादोरसानिफ्राय दैथायहरनाय (Transfer) बिफानफोरा आयेन आव महर मोन्नो थाखाय गोबाव समनिफ्रायनो नेबोगासिनो दं। आसा खालामो बैफोर बिफानफोरा थाबैनो हादोरसा खुंगिरि बिथांनि गनायथि मोन्नानै गोदान गोहो आरो आयेन दाफुंजागोन।
बीटीसी खुंथायनि बाजेतनि जथुमायाव मंगलबारखालि बेरेखा सोद्रोमा मावथि ब्रम्ह बिथांआ सोंथि सोङोदि, बीटीसी खुंथायाव 2005 माइथायनिफ्रायनो सोदांबोनाय मोन 23 आयेन आरो बिलफोरा मानि थाखाय आसाम खुंगिरि बिथांनि गनायथि मोनाखै? बिथांआ सोंथि सोंबावोदि, बीटीसी बिधान सभायाव सोदांनाय आयेनफोरखौ गोख्रों खालामनो थाखाय खुंथायनि बिपिएफ दोलोआ आसाम खुंगिरि बिथांनि गनायथिखौ मानो मोन्नो हायाखै?
मखनो गोनांदि, बीटीसी खुंथायनि बिपिएफ राजखान्थि दोलोआ हादोरसायाव कंग्रेस खुंथायाव थानाय समाव 10 बोसोर खुंथायजों गोरोबथायाव दंमोन आरो बिथांमोनहा दानि सोलिफुगासिनो थानाय बिजेपि राजखान्थि दोलोजोंबो गोरोबथायाव दं।
बिथांआ गोख्रोङै बुंदोंदि, जुदि बिपिएफ दोलोआ हादोरसानि खुंथायजों थाफानानै किंग मेकार (राजा) बायदि सानदोंब्ला बैफोर आयेनफोरखौ दाफुंनायाव नांगौ जानाय आसाम खुंगिरिनि गनायति मोन्नायाव जेबो जेंनां सोमजिनो मोननांआ। बिथांआ बुंबावदोंदि, “बीटीसीखौ दाफुंजेन्नायनिफ्रायनो आखायाव आयेन गैया लासे खुंबोनाया जोबोद दुखुनांथाव जानानै दं”।
मखनो गोनांदि, बड’लेन्ड टेरिटरियेल काउनसिल (बीटीसी) खुंथायनि गाहाय आरो रां बिफान्नि बिबानगिरि हाग्रामा महिलारि बिथांआ मंगलबाराव 2019-20 माइथायनि थाखाय गासै 4667.7662 कौटी रांनि गेजेराव 42.5206 कौटी सारप्लास बाजेत एबा बारा रांनि हिसाब होयो।
खौरां मोन्नाय बादिब्ला बीटीसी खुंथाया सान्नैनि हाबाफारि लानानै बीटीसी बिधान सभायाव 2019-20 माइथायनि थाखाय रांनि हिसाब एबा औदितखौ नोजोर होनानै जथुमा खुंफुङो।
बाजेतनि गेजेरजों बीटीएडि ओनसोलाव गामियारि ओनसोल जौगाखां लाबोनायजों लोगोसे देहायारि, लामा जौगाखांनाय, सोलोंथाय आरो आबाद बिथिंखौ बांसिनै नोजोर होदों। बेफोरजों लोगोसे गुबुन गुबुन जौगाखां खामानिफोरखौबो मावफुंलांनो थांखि लाबावो।
