गोदान दिल्ली/गुवाहाटी,डिसेम्बर 31: भारत हादोरनि गाहाय मंत्री नारेन्ड्र मोडी बिथांआ थांनाय 2018 माइथायनि गोलाव समनि गुबुन गुबुन बिथिंनि सायाव मावबोनाय खामानिफोरखौ बुंफोरनानै हादोरनि साफ्रोमबो सुबुंफोरखौ फैगौ गोदान बोसोर 2019 माइथायाव गोदान मिजिं लानानै गोजौ थांखि लानो खावलायहरो।
बिथांआ दानफायारि 51थि रेडिव प्रग्रामनि गेजेरजों 2018 माइथायाव जोबथा ‘मन की बात’नि बाथ्राखौ बुंनानै बायदि बायदि बिथिंनि सायाव हाबा मावबोनो नाजाबोनाय आरो जाफुंसार जाबोनायनि सायाव बाथ्रा फोरमायनानै होयो।
बिथांआ रेडिव प्रग्रामनि गेजेरजों हादोरनि रांखान्थि, सामाजखान्थि, सलारनि गोहो जौगाखांनाय, बोथोर सोलायनाय, गेलेनाय आरो बायदि बायदि बिथिंआव जौगाखां जाबोनायफोरनि सायाव बाथ्रा बुंनानै बेफोरबादि जौगाखांना जाबोनाया साफ्रोमबो हादोरनि सुबुंफोरनि हेफाजाब आव जाफुंसार जादों होन्ना बुङो।
हादोरनि सिङाव गोरिब थाखोनि नखरखौ फोजोबनो नाजाबोनाया मखजाथाव थाखोसिम जाफुंसारदों होननानै बुथांआ बुङोदि, “2018 माइथायाव बेफार फालांगि खालामनाय “ease of doing business” बिथिंआव सिमा गोयै जौगाबोदों आरो मुलुगनां फसंथानफोरा भारत हादोरनि जौगानायखौ बाखोनायनानै जौगाखां फारिलाइआव थिसनदों”।
2018 माइथायाव भारत हादोरा जौगाखां जाबोदों होन्नानै बिथांआ बुङोदि, सारदार भल्लाभाय पातेलनि मुङाव 2018 माइथायावनो बुहुमनि देरसिन देहायारि स्किम ‘आयुसमेन भारत’ खौ फोसावनाय जादों। भारत हादोरा बुहुमनि जौसिन खौसेथिनि मुसुखाखौ नुनो मोनदों, हादोरनि मोनफ्रोमबो गामिफोराव मोब्लिब गोहोखौ नुनो मोनबाय, फालांगियारि बिथिंआव नांगौबादि जौगाखां जाबोबाय, 75थि आजाद हिन्द सरकारनि बोसोरारि फालिनायाव दिल्लीनि रेड पर्डआव मोनथाम गाबनि फिरफिलाखौ गिबि खेबनि थाखाय बेखेवनो हाबाय, आरो मुंदाखा ‘इउनायटेड नेशन इनभारमेन्ट’ एबा आबहावायारि बान्था ‘चेम्पियन अव दा आर्ट’ बान्थाखौ मोन्नो हाबाय होन्ना बुङो।
नारेन्ड्र मोडी बिथांआ बुङोदि, “हादोरखौ रैखाथि होनाय आदबफोरा गोख्रोंसिन जाबोनो हमबाय, आरो बे बोसोरावनो भारत हादोरानि निउक्लियार ट्रायड गोहोखौ आन्जाद नायनाया आबुङै जाफुंसार जाबाय, जायनि थाखाय जों लैथो, लैथोमा, हा, अख्रां फारफ्रोमथिंबो गोख्रों जानो हाबाय”। बिथांआ बुंबावोदि, “आबहावायारि सांग्रांथि होनाय आरो सिखोन साकोन लाखिनाय ‘स्वास भारत मिशन’ आ 95 जौखोन्दो जाफुंसारनानै दावगालांगासिनो दं”।
बिथांआ बुंबावोदि, भारानासिआव थानाय गंगा दैमायाव गिबिसिन माल्टि मडेल टार्मिनेलखौ बेखेवबाय आरो सा-सान्जा भारतआव थानाय सिक्किम हादोरसायाव गिबिसिन बिरखं गाथोन (AIRPORT) खौबो बेखेवबाय, जाय खामानिआ जों भारत हादोरनि जाफुंसारनाय। बिथांआ बेखौबो बुङोदि, बावैसो जालांनाय एसियान गेम्स एबा गेलेनाय बादायलायनायाव गोबां मेडेल आवग्रिनो हाबाय आरो क्रिकेट गेलेनाय बिथिंआवबो मोजाङैनो जाफुंसारदों होन्ना बुंबावो।
गाहाय मंत्री बिथांआ खुम्ब मेला आरो 26 जानुवारिनि उदांस्रि साननि फारसे बिथा खालामनानै बिथांआ बुङोदि, बुहुमनांङैनो मिथिसारजानाय ‘खुम्ब मेला’जाय मेलायाव गासै मोन 150 हादोरफोरा भारत हादोराव गोथार गोसो लानानै बाहागो लाफैगोन आरो गुबुन रोखोमनि सान्नाय हनायजों लोगोसे माबा मोनसे सोलोंगोन, खुम्ब मेलाया भारत हादोरनि हारिमुखौ बुहुमाव मिथिसारहोगोन होन्नानै बिथांआ बुंबावोदि, बे बोसोराव हादोरनि बिफा महात्मा गान्डीनि 150थि जोनोम सानखौबो फालिनो थांगासिनो दं होन्ना बुंबावो।
खोला आफ्रिकानि बार्ग हादोरगिरि नेलसन मेन्डेलाखौ गोसोखांनानै बिथांआ बुङोदि, महात्मा गान्डीनि 150थि जोनोम सान फालिनाय समाव खोला आफ्रिखानि सोलिफु हादोरगिरि चाइरिल रामाफशा बिथांआ गाहाय आलासि महरै बाहागो लाफैगोन।
गाहाय मंत्री बिथांआ नंखाय रादाबफोरखौ नोजोर होनानै गोसारहोआलासे थार रादाबफोरखौ गोनांथि सान्नानै गोसारहोनो खावलायो।
बिथांआ मोडाआ थार रादाब मिथिनो थाखाय thebetterindia.com, आरो yourstory.com Web Portal फोरखौ नायनो खावलायो, जाय Web Portal आ लिरबिदांनि गेजेरजों सुबुं जिउ आरो समाज दानायाव मोजां बोसोन होयो।
